AKTIN NÖVÜ
AZƏRBAYCAN RESPUBLİKASI NAZİRLƏR KABİNETİNİN QƏRARLARI
QƏBUL EDİLDİYİ TARİX
01.02.2008
QEYDİYYAT NÖMRƏSİ
21
ADI
“İnsan alveri cinayəti qurbanlarının insan alverinə qarşı mübarizə üzrə xüsusi polis qurumuna təhvil verilməsi Qaydaları”nın təsdiq edilməsi haqqında
RƏSMİ DƏRC EDİLDİYİ MƏNBƏ
Azərbaycan Respublikasının Qanunvericilik Toplusu (Dərc olunma tarixi: 29-02-2008, Nəşr nömrəsi: 02, Maddə nömrəsi: 103)
QÜVVƏYƏ MİNMƏ TARİXİ
01.02.2008
AZƏRBAYCAN RESPUBLİKASI VAHİD HÜQUQi TƏSNİFATI ÜZRƏ İNDEKS KODU
390.000.000
HÜQUQİ AKTLARIN DÖVLƏT REYESTRİNİN QEYDİYYAT NÖMRƏSİ
HÜQUQİ AKTIN HÜQUQİ AKTLARIN DÖVLƏT REYESTRİNƏ DAXİL EDİLDİYİ TARİX
01.07.2011
“İnsan alveri cinayəti qurbanlarının insan alverinə qarşı mübarizə üzrə xüsusi polis qurumuna təhvil verilməsi Qaydaları”nın təsdiq edilməsi haqqında

“İnsan alveri cinayəti qurbanlarının insan alverinə qarşı mübarizə üzrə xüsusi polis qurumuna təhvil verilməsi Qaydaları”nın təsdiq edilməsi haqqında

 

AZƏRBAYCAN RESPUBLİKASI NAZİRLƏR KABİNETİNİN QƏRARI

 

“Azərbaycan Respublikasında İnsan Alverinə Qarşı Mübarizə üzrə Milli Fəaliyyət Planının təsdiq edilməsi haqqında” Azərbaycan Respublikası Prezidentinin 2004-cü il 6 may tarixli 208 nömrəli Sərəncamının 3-cü bəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. “İnsan alveri cinayət qurbanlarının insan alverinə qarşı mübarizə üzrə xüsusi polis qurumuna təhvil verilməsi Qaydaları” təsdiq edilsin (əlavə olunur).

2. Bu qərar imzalandığı gündən qüvvəyə minir.

 

 

Azərbaycan Respublikasının Baş naziri A. RASİZADƏ   

 

Bakı şəhəri, 1 fevral 2008-ci il

                        21

 

 

Azərbaycan Respublikası Nazirlər Kabinetinin

2008-ci il 1 fevral tarixli 21 nömrəli qərarı ilə

TƏSDİQ EDİLMİŞDİR

 

İnsan alveri cinayəti qurbanlarının insan alverinə qarşı mübarizə üzrə xüsusi polis qurumuna

təhvil verilməsi

 

QAYDALARI

 

 

1. Bu Qaydalar “İnsan Alverinə Qarşı Mübarizə haqqında” Azərbaycan Respublikasının Qanununa, Azərbaycan Respublikası Prezidentinin 2004-cü il 6 may tarixli 208 nömrəli Sərəncamı ilə təsdiq edilmiş “Azərbaycan Respublikasında İnsan Alverinə Qarşı Mübarizə üzrə Milli Fəaliyyət Planı”nın müddəalarına uyğun olaraq hazırlanmışdır, dövlət və qeyri-dövlət qurumları tərəfindən insan alveri cinayətinin qurbanı olmuş şəxslərin və ehtimal edilən qurbanların insan alverinə qarşı mübarizə üzrə xüsusi polis qurumuna (bundan sonra – xüsusi polis qurumu) təhvil verilməsi mexanizmlərini tənzimləyir.

2. İnsan alveri cinayətinin qurbanlarını müəyyən edən qurumlar ilk növbədə onların təhlükəsizliyini, şəxsiyyətinin anonimliyini və barələrində əldə edilmiş məlumatların konfidensiallığını təmin etməlidirlər.

3. İnsan alveri cinayətinin qurbanlarını müəyyən edən qurumlarda həmin şəxslərin ərizə və müraciətlərini qeydiyyatı məxfilik rejiminə riayət olunmaqla, xüsusi jurnalda aparılır.

4. İnsan alveri cinayətinin qurbanlarını və ehtimal olunan qurbanları müəyyən etmiş qurumlar onlara qanunvericilikdə nəzərdə tutulmuş hüquqlarını izah etməli, təhvil veriləcəkləri qurum, həmin qurumun səlahiyyətləri, eləcə də sonrakı mümkün prosessual hərəkətlər barədə məlumat verməlidirlər.

5. 16 yaşınadək olan şəxslərin və əqli cəhətdən zəiflik əlamətləri olan yetkinlik yaşına çatmayanların insan alverinin qurbanları və ya ehtimal edilən qurbanlar olmalarının müəyyənləşdirilməsi ilə bağlı aparılan araşdırmalarda müvafiq olaraq pedaqoqun, yaxud psixoloqun iştirakı ilə təmin edilməlidir.

6. Şəxsin insan alverindən zərər çəkməsi ehtimal olunduqda, yaxud insan alveri cinayətinin hazırlanması və ya törədilməsi digər qurumlar tərəfindən aşkar edildikdə, insan alveri qurbanlarının təhlükəsizliyinin təmin edilməsi, onlara peşəkar yardım göstərilməsi, insan alverinə qarşı mübarizə sahəsində məlumatların vahid mərkəzdə cəmlənməsi və qorunması məqsədi ilə bu barədə xüsusi polis qurumuna dərhal məlumat verilməlidir.

7. İnsan alveri cinayətinin qurbanları və ehtimal olunan qurbanları müəyyən edildikdən sonra onların müraciətləri qanunvericilikdə nəzərdə tutulmuş qaydada rəsmiləşdirilərək, 24 saatdan gec olmayaraq şəxsin xüsusi polis qurumuna təhvil verilməsi üçün təxirəsalınmaz tədbirlər görülməklə, onun müvafiq sənədləri həmin quruma təqdim edilir və lazımi köməklik göstərilir.

8. İnsan alveri cinayəti qurbanlarının və ehtimal olunan qurbanların müəyyən edilməsi və xüsusi polis qurumuna təhvil verilməsi prosesində onların hüquq və azadlıqları pozulmamalı, şərəf və ləyaqətinə toxunan hərəkətlərə yol verilməməli, hər biri ilə nəzakətlə davranılmalıdır.

9. İnsan alveri cinayətinin qurbanları və ehtimal olunan qurbanlar və onlar barədə müvafiq sənədlər yalnız xüsusi polis qurumunun növbətçisinə təhvil verilir.

10. İnsan alveri qurbanlarının və ya ehtimal edilən qurbanların başqa polis qurumuna, yaxud hüquq-mühafizə orqanına təhvil verilməsi qadağandır.

11. Xüsusi polis qurumunda insan alveri cinayətinin qurbanlarını və onların müvafiq sənədlərini təhvil verən və qəbul edən şəxslər barədə qeydiyyat aparılır.

12. İnsan alverinə qarşı mübarizə üzrə xüsusi polis qurumu tərəfindən aparılmış araşdırmanın nəticələrinə dair insan alveri cinayətinin qurbanlarını və ehtimal edilən qurbanları təhvil vermiş müvafiq quruma məlumat verilir.

Müqayisə beta versiyadadır. Üzərində işlənilir.

Tarix
Versiyalar
Müqayisə
Növü
Sənədin adı
Nömrəsi
Əlaqə
Reyestr nömrəsi
Qəbul
edilmə tarixi
Status