"Dövlət əmlakının özəlləşdirilməsi haqqında" Azərbaycan Respublikası Qanununun icrası ilə bağlı əlavə tədbirlər barədə

AZƏRBAYCAN RESPUBLİKASI PREZİDENTİNİN FƏRMANI

"Dövlət əmlakının özəlləşdirilməsi haqqında" Azərbaycan Respublikası Qanununun icrasını təmin etmək məqsədi ilə qərara alıram:

I. Aşağıdakı normativ hüquqi aktlar təsdiq edilsin (əlavə olunur):

"Dövlət müəssisəsini özəlləşdirmə komissiyasının fəaliyyəti haqqında Əsasnamə";

"Yerli icra hakimiyyəti orqanlarının sərəncamında olan, habelə yaşayış binalarında yerləşib dövlət vəsaiti hesabına inşa edilmiş qeyri-yaşayış sahələrinin özəlləşdirilməsi Qaydaları";

"Özəlləşdirilən dövlət əmlakının qiymətləndirilməsi haqqında Əsasnamə";

"Açıq tipli səhmdar cəmiyyətinə çevrilən dövlət müəssisələrinin səhmlərinin əmək kollektivinə güzəştli satışı haqqında Əsasnamə";

"İcarəyə verilmiş dövlət əmlakının özəlləşdirilməsi haqqında Əsasnamə";

"Dövlət özəlləşdirmə opsionları haqqında Əsasnamə";

"Dövlət müəssisələrinin fərdi layihələr üzrə özəlləşdirilməsi Qaydaları";

"Dövlət əmlakının hərraclar vasitəsi ilə satışı Qaydaları";

"Dövlət əmlakının ixtisaslaşdırılmış çek və pul hərraclarında satışı Qaydaları";

"Dövlət müəssisələrinin müflis elan olunma yolu ilə özəlləşdirilməsi Qaydaları";

"Özəlləşdirmədən əldə olunan vəsaitin Azərbaycan Respublikasının dövlət büdcəsinə daxil edilməsi və ondan istifadə olunması Qaydaları";

"Özəlləşdirilən dövlət əmlakına (müəssisə və obyektlərinə) mülkiyyət hüququnun rəsmiləşdirilməsi Qaydaları".

II. "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" Azərbaycan Respublikası Prezidentinin 1996-cı il 25 mart tarixli 450 nömrəli Fərmanına aşağıdakı dəyişikliklər edilsin:

1. Birinci abzasdan "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"nın təsdiq edilməsi haqqında 1995-ci il 29 oktyabr tarixli Azərbaycan Respublikasının Qanununa uyğun olaraq" sözləri çıxarılsın.

2. 2-ci bəndin birinci və ikinci abzaslarından "bu Fərman qüvvəyə minən günədək qeydə alınmış" sözləri çıxarılsın.

3. 2-ci bəndin üçüncü abzasında "Azərbaycan Respublikasının 29 oktyabr 1995-ci il tarixli Qanunu ilə təsdiq edilmiş "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"nda" sözləri "Qanunvericilikdə" sözü ilə əvəz edilsin.

III. Azərbaycan Respublikası Prezidentinin "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" 1996-cı il 25 mart tarixli 450 nömrəli Fərmanı ilə təsdiq edilmiş "Azərbaycan Respublikasında dövlət özəlləşdirmə payları (çekləri) haqqında Əsasnamə"yə aşağıdakı dəyişikliklər edilsin:

1. 1 bölmənin 1-ci bəndindən "bu Əsasnamə qüvvəyə minən günədək qeydə alınmış" sözləri çıxarılsın.

2. II bölmənin 1-ci bəndindən "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" Azərbaycan Respublikası Prezidentinin Fərmanı qüvvəyə mindiyi gündən" sözləri çıxarılsın.

3. II bölmənin 2-ci bəndindən "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" Azərbaycan Respublikası Prezidentinin fərmanının qüvvəyə mindiyi günədək qeydə alınmış" sözləri çıxarılsın.

4. II bölmənin 3-cü bəndində "Azərbaycan Respublikasının 1995-ci il 29 oktyabr tarixli Qanunu ilə təsdiq edilmiş "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"nda" sözləri "Qanunvericilikdə" sözü ilə əvəz edilsin.

5. III bölmənin 2-ci bəndinin ikinci abzasından "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" Azərbaycan Respublikası Prezidentinin Fərmanına əsasən paylar " sözləri çıxarılsın.

IV. Azərbaycan Respublikası Prezidentinin "Dövlət mülkiyyətinin özəlləşdirilməsini tənzimləyən bir sıra normativ sənədlərin təsdiq edilməsi haqqında" 1996-cı il 25 mart tarixli 451 nömrəli Fərmanı ilə təsdiq edilmiş "Tikintisi dondurulmuş, tikintisinin normativ müddətləri ötmüş və tikintisi başa çatdırılmamış obyektlərin özəlləşdirilməsi haqqında" Əsasnaməyə aşağıdakı dəyişikliklər edilsin:

1. 1-ci bənddən "Azərbaycan Respublikasında dövlət mülkiyyətinin özəlləşdirilməsi haqqında" Azərbaycan Respublikası Qanununun və "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"nın tələblərinə uyğun olaraq hazırlanmış və" sözləri çıxarılsın.

2. 7-ci bəndin 4-cü abzasında "25" rəqəmi "20" rəqəmi ilə əvəz edilsin.

3. 10-cu bəndin birinci cümləsində "müsabiqə" sözü "investisiya müsabiqəsi" sözləri ilə əvəz edilsin.

4. 10-cu bəndin ikinci cümləsi çıxarılsın.

5. 16-cı bənddən "kommersiya müsabiqələri" sözləri çıxarılsın.

V. "Dövlət müəssisələrinin səhmdar cəmiyyətinə çevrilməsinin qaydaları haqqında" Əsasnamənin təsdiq edilməsi barədə" Azərbaycan Respublikası Qanununun tətbiq edilməsi haqqında" Azərbaycan Respublikası Prezidentinin 1996-cı il 17 dekabr tarixli, 522 nömrəli Fərmanına aşağıdakı dəyişikliklər və əlavə edilsin:

1. 1-ci bəndin 3-cü abzasında "Azərbaycan Respublikasının Nazirlər Kabineti" sözləri "Azərbaycan Respublikasının Dövlət Əmlakı Nazirliyi" sözləri ilə əvəz edilsin.

2. 1-ci bəndin dördüncü abzası çıxarılsın.

3. 1-ci bəndin beşinci abzasına "7.7-ci yarımbəndinin" sözlərindən sonra "1-ci və" sözləri əlavə edilsin.

4. 3-cü və 4-cü bəndlər çıxarılsın.

VI. Azərbaycan Respublikası Prezidentinin "İxtisaslaşdırılmış çek investisiya fondları haqqında" Əsasnamənin təsdiq edilməsi barədə" 1997-ci il 14 may tarixli, 579 nömrəli Fərmanı ilə təsdiq edilmiş "İxtisaslaşdırılmış çek investisiya fondları haqqında Əsasnamə"nin 3-cü bölməsinin 1-ci bəndində "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"nın 7 nömrəli əlavəsinin 10-cu bəndinə müvafiq olaraq" sözləri çıxarılsın.

VII. Azərbaycan Respublikası Prezidentinin "Özəlləşdirilən dövlət müəssisə və obyektlərinin yerləşdiyi torpaq sahələrinin satılması qaydaları haqqında" Əsasnamənin təsdiq edilməsi barədə" 1997-ci il 19 dekabr tarixli, 659 nömrəli Fərmanının preambulasında "1995-ci il 29 sentyabr tarixli Azərbaycan Respublikasının Qanunu ilə təsdiq edilmiş "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"na sözləri "Azərbaycan Respublikasının qanunvericiliyinə" sözləri ilə əvəz edilsin.

VIII. Azərbaycan Respublikası Prezidentinin "Özəlləşdirilən dövlət müəssisə və obyektlərinin yerləşdiyi torpaq sahələrinin satılması qaydaları haqqında" Əsasnamənin təsdiq edilməsi barədə" 1997-ci il 19 dekabr tarixli, 659 nömrəli Fərmanı ilə təsdiq edilmiş "Özəlləşdirilən müəssisə və obyektlərin yerləşdiyi torpaq sahələrinin satılması qaydaları haqqında Əsasnamə"yə aşağıdakı dəyişikliklər edilsin:

1. 1-ci bənddən "Azərbaycan Respublikasında 1995-1998-ci illərdə dövlət mülkiyyətinin özəlləşdirilməsinin Dövlət Proqramı"na sözləri çıxarılsın.

2. 3-cü bəndin 4-cü abzasında və 12-ci bəndin 3-cü abzasında "75" rəqəmi "80" rəqəmi ilə əvəz edilsin.

3. 3-cü bəndin 5-ci abzasında "25" rəqəmi "20" rəqəmi ilə əvəz edilsin.

IX. Azərbaycan Respublikası Prezidentinin "İnvestisiya müsabiqəsi haqqında" Əsasnamənin təsdiq edilməsi barədə" 1998-ci il 28 sentyabr tarixli, 771 nömrəli Fərmanı ilə təsdiq edilmiş "İnvestisiya müsabiqəsi haqqında Əsasnamə"nin 1.2-ci bəndinin 1-ci abzasında mötərizədə verilmiş "Azərbaycan Respublikasının Nazirlər Kabineti" sözləri çıxarılsın.

X. Bu Fərmanın II - IX bəndlərində verilən fərmanların və əsasnamələrin mətnində müvafiq olaraq ismin uyğun hallarında tətbiq edilən "Dövlət Əmlak Komitəsi" və "DƏK" sözləri ismin uyğun hallarında "Dövlət Əmlakı Nazirliyi" və "DƏN" sözləri ilə əvəz edilsin.

XI. "Bələdiyyə mülkiyyətinə əmlakın verilməsi haqqında" Azərbaycan Respublikası Qanununun tətbiq edilməsi barədə" Azərbaycan Respublikası Prezidentinin 2000-ci il 15 yanvar tarixli, 253 nömrəli Fərmanının 2-ci bəndinin ikinci abzasından "Azərbaycan Respublikası Nazirlər Kabinetinin qərarı ilə özəlləşdirilən müəssisə və obyektlər, yerli icra hakimiyyəti orqanları ilə razılaşdırılaraq" sözləri çıxarılsın.

XII. Aşağıdakı normativ hüquqi aktlar qüvvədən düşmüş hesab edilsin:

"Dövlət mülkiyyətinin özəlləşdirilməsini tənzimləyən bir sıra normativ sənədlərin təsdiq edilməsi haqqında" Azərbaycan Respublikası Prezidentinin 1996-cı il 25 mart tarixli, 451 nömrəli Fərmanının 1-ci bəndinin ikinci, dördüncü, beşinci və altıncı abzasları;

"Dövlət mülkiyyətinin özəlləşdirilməsinin həyata keçirilməsini təmin edən bəzi normativ hüquqi aktların təsdiq edilməsi haqqında" Azərbaycan Respublikası Prezidentinin 1996-cı il 24 sentyabr tarixli, 498 nömrəli Fərmanı;

"İcarəyə verilmiş dövlət əmlakının özəlləşdirilməsi haqqında" Əsasnamənin təsdiq edilməsi barədə" Azərbaycan Respublikası Prezidentinin 1997-ci il 7 fevral tarixli, 550 nömrəli Fərmanının 1-ci və 2-ci bəndləri;

"Dövlət müəssisəni özəlləşdirmə komissiyasının fəaliyyəti haqqında" Əsasnamənin təsdiq edilməsi barədə" Azərbaycan Respublikası Prezidentinin 1997-ci il 29 aprel tarixli, 576 nömrəli Fərmanı;

"Dövlət özəlləşdirmə opsionları haqqında" Əsasnamənin təsdiq edilməsi barədə" Azərbaycan Respublikası Prezidentinin 1997-ci il 14 may tarixli, 578 nömrəli Fərmanı;

"Yerli icra hakimiyyəti orqanlarının sərəncamında olan qeyri-yaşayış sahələrinin özəlləşdirilməsi qaydaları haqqında" Əsasnamənin təsdiq edilməsi barədə" Azərbaycan Respublikası Prezidentinin 1997-ci il 16 may tarixli, 584 nömrəli Fərmanı;

"Azərbaycan Respublikasında dövlət mülkiyyətinin özəlləşdirilməsinin həyata keçirilməsinə nəzarəti təmin edən Dövlət Komissiyasının yeni tərkibi haqqında" Azərbaycan Respublikası Prezidentinin 1996-cı il 3 may tarixli, 306 nömrəli Sərəncamı;

"İxtisaslaşdırılmış çek auksionlarının mütəşəkkil keçirilməsinin təmin edilməsi haqqında" Azərbaycan Respublikası Prezidentinin 1997-ci il 16 may tarixli, 569 nömrəli Sərəncamı.

XIII. Azərbaycan Respublikasının Dövlət Əmlakı Nazirliyinə tapşırılsın ki, bu Fərmandan irəli gələn lazımi tədbirləri görsün.

XIV. Bu Fərman dərc olunduğu gündən qüvvəyə minir.


Azərbaycan Respublikasının Prezidenti Heydər ӘLİYEV

Bakı şəhəri, 23 dekabr 2000-ci il
432

 

Azərbaycan Respublikası Prezidentinin
2000-ci il 23 dekabr tarixli 432 nömrəli Fərmanı ilə

TӘSDİQ edİlmİşdİr

 

Dövlət müəssisəsini özəlləşdirmə

komissiyasının fəaliyyəti haqqında
ƏSASNAMƏ

1. Ümumİ müddəalar

1.1. Bu Əsasnamə "Dövlət əmlakının özəlləşdirilməsi haqqında" Azərbaycan Respublikasının Qanununa və "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır.

1.2. Bu Əsasnamə dövlət müəssisələrinin səhmdar cəmiyyətlərinə çevrilməsi və onların özəlləşdirilməsinə hazırlıq işlərinin aparılması məqsədi ilə hər bir müəssisədə (birlikdə) dövlət müəssisəsini özəlləşdirmə komissiyasının (bundan sonra - komissiya) yaradılması və fəaliyyətinin təşkili qaydalarını müəyyən edir.

1.3. Komissiya öz fəaliyyətində Azərbaycan Respublikasının qanunlarını, II Dövlət Proqramını, Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər Kabinetinin qərarlarını, habelə bu Əsasnaməni rəhbər tutur.

2. Dövlət müəssİsəsİnİ özəlləşdİrmə komİssİyasının yaradılması

2.1. II Dövlət Proqramına uyğun olaraq dövlət müəssisəsinin özəlləşdirilməsi zamanı onun səhmdar cəmiyyətinə çevrilməsi haqqında müvafiq icra hakimiyyəti orqanı tərəfindən qərar qəbul edildiyi gündən 10 (on) gün ərzində müəssisə rəhbəri tərəfindən əmək kollektivinin rəyi nəzərə alınmaqla müəssisədə (birlikdə) komissiya yaradılır. Müəssisə rəhbəri komissiyanın yaradılması barədə Azərbaycan Respublikasının Dövlət Əmlakı Nazirliyinə (bundan sonra - Dövlət Əmlakı Nazirliyi) 3 (üç) gün ərzində yazılı məlumat verir.

2.2. Komissiya II Dövlət Proqramına müvafiq olaraq dövlət müəssisəsinin səhmdar cəmiyyətinə çevrilməsi haqqında qərar qəbul edildiyi gündən etibarən ən geci 3 (üç) ay müddətində II Dövlət Proqramının 5.4-cü bəndində göstərilən sənədləri hazırlayıb təsdiq olunmaq üçün Dövlət Əmlakı Nazirliyinə təqdim edir. Qeyd olunan müddət ərzində sənədlər hazırlanıb təqdim edilmədikdə, II Dövlət Proqramının 5.5.-ci bəndinə uyğun, Dövlət Əmlakı Nazirliyinin qərarı ilə komissiya yaradılır.

2.3. Komissiyanın tərkibi bu Əsasnamənin 2.1-ci və 2.2.-ci bəndlərində nəzərdə tutulmuş hallarda aşağıdakı qaydada müəyyən edilir:

özəlləşdirilən müəssisə orta müəssisə qrupuna aid olduqda komissiyanın tərkibi 5 (beş) nəfərdən ibarət formalaşdırılır və onun tərkibinə özəlləşdirilən müəssisənin (1 nəfər), yerli icra hakimiyyətinin (1 nəfər), Dövlət Əmlakı Nazirliyinin (2 nəfər), Azərbaycan Respublikası Maliyyə Nazirliyinin və ya Azərbaycan Respublikası Vergilər Nazirliyinin (1 nəfər) nümayəndələri daxil edilir. Özəlləşdirilən müəssisə inhisarçı təsərrüfat subyektinə aid olduqda komissiyanın tərkibi 7 (yeddi) nəfərdən ibarət formalaşdırılır və onun tərkibinə özəlləşdirilən müəssisənin (1 nəfər), yerli icra hakimiyyətinin (1 nəfər), Dövlət Əmlakı Nazirliyinin (2 nəfər), Azərbaycan Respublikası Maliyyə Nazirliyinin (1 nəfər), Azərbaycan Respublikası Vergilər Nazirliyinin (1 nəfər), Azərbaycan Respublikası Dövlət Antiinhisar Siyasəti və Sahibkarlığa Kömək Komitəsinin (1 nəfər) nümayəndələri daxil edilir;

özəlləşdirilən müəssisə iri müəssisə qrupuna aid olduqda komissiyanın tərkibi 9 (doqquz) nəfərdən ibarət formalaşdırılır və onun tərkibinə özəlləşdirilən müəssisənin (2 nəfər), yerli icra hakimiyyətinin (1 nəfər), Dövlət Əmlakı Nazirliyinin (2 nəfər), Azərbaycan Respublikası Maliyyə Nazirliyinin (1 nəfər), Azərbaycan Respublikası Vergilər Nazirliyinin (1 nəfər), Azərbaycan Respublikası İqtisadiyyat Nazirliyinin (1 nəfər) və Azərbaycan Respublikası Dövlət Antiinhisar Siyasəti və Sahibkarlığa Kömək Komitəsinin (1 nəfər) nümayəndələri daxil edilir.

2.4. Bu Əsasnamənin 2.1-ci bəndində göstərilən halda özəlləşdirilən müəssisə, 2.2-ci bəndində göstərilən halda (komissiya Dövlət Əmlakı Nazirliyi tərəfindən yaradıldıqda) isə Dövlət Əmlakı Nazirliyi komissiyanın tərkibinə öz nümayəndələrini təqdim etmələri barədə müvafiq icra hakimiyyəti orqanlarına müraciət edir. Həmin orqanlar bu müraciətə əsasən 3 (üç) gün müddətində komissiyaya öz nümayəndələrini təyin etməlidirlər.

3. Dövlət müəssİsəsİnİ özəlləşdİrmə komİssİyasının əsas vəzİfələrİ

3.1. Komissiyanın əsas vəzifələri aşağıdakılardır:

Dövlət Proqramının 5.4-cü bəndində göstərilən sənədlərin işlənib hazırlanmasını təmin etmək və təsdiq olunmaq üçün Dövlət Əmlakı Nazirliyinə təqdim etmək;

özəlləşdirilən dövlət müəssisələrinin səhmlərinin (hissələrinin) 15 faizini güzəştli şərtlərlə satın almaq hüququ olan şəxslərin siyahısını tərtib etmək;

kütləvi informasiya vasitələri üçün özəlləşdirilən müəssisələr haqqında Dövlət Proqramında nəzərdə tutulmuş məlumatları hazırlamaq və Dövlət Əmlakı Nazirliyinə təqdim etmək;

özəlləşdirilən dövlət müəssisələrinin balansında olan və onların tərkibindən çıxarılan sosial-mədəni və kommunal-məişət təyinatlı obyektlərin siyahısını tərtib edərək Dövlət Əmlakı Nazirliyinə təqdim etmək, habelə müvafiq təşkilatların və yerli icra hakimiyyəti (və ya bələdiyyə) orqanlarının balansına verilməsi məqsədəuyğun hesab edilməyən sosial-mədəni və kommunal-məişət təyinatlı obyektlərin özəlləşdirilən müəssisələrlə birlikdə və ya ayrıca özəlləşdirilməsi barədə təkliflər vermək;

normativ hüquqi aktlarla müəyyən edilmiş digər vəzifələri yerinə yetirmək.

4. Dövlət müəssİsəsİnİ özəlləşdİrmə komİssİyasının hüquqları

4.1. Komissiyanın aşağıdakı hüquqları vardır:

Dövlət Proqramının 5.4-cü bəndində göstərilən sənədlərin işlənib hazırlanması üçün müəssisə rəhbərliyindən lazımi sənədləri tələb etmək;

özəlləşdirmə zamanı müəssisənin sosial infrastruktur obyektlərindən istifadə olunması barədə təkliflər hazırlayıb Dövlət Əmlakı Nazirliyinə təqdim etmək;

zəruri hallarda öz işinə müstəqil auditor, ekspert və məsləhətçi cəlb etmək;

ona həvalə edilmiş vəzifələrin həyata keçirilməsini təmin etmək məqsədi ilə özəlləşdirilən müəssisənin rəhbərliyinə lazımi tapşırıqlar vermək;

normativ hüquqi aktlarla müəyyən edilmiş digər hüquqlar.

5. Dövlət müəssİsəsİnİ özəlləşdİrmə komİssİyasının fəalİyyətİnİn təşkİlİ

5.1. Komissiyanın iclasları həftədə bir dəfədən az olmayaraq keçirilir.

Komissiyanın hər bir üzvü komissiyanın iclaslarında iştirak etməyə borcludur. O, komissiyanın iclaslarında iştirak edə bilmədiyi halda bunun səbəbini bildirməklə komissiyanın sədrini xəbərdar etməlidir.

5.2. Komissiyanın iclaslarında baxılacaq məsələlər üzrə materialların surətləri və qərar layihələri komissiyanın bütün üzvlərinə iclasa azı iki gün qalmış paylanmalıdır.

5.3. Komissiyanın iclası komissiya üzvlərinin üçdə iki hissəsinin iştirakı təmin olunduqda səlahiyyətli hesab olunur.

5.4. Komissiyanın iclaslarının gündəliyi onun iclasında iştirak edən komissiya üzvlərinin ümumi sayının sadə səs çoxluğu ilə təsdiq edilir.

Komissiyanın hər bir üzvi səsvermə zamanı bir səsə malikdir.

Komissiyanın iclasında təkliflər növbə ilə səsə qoyulur.

Komissiyanın qərarları onun iclaslarında açıq səsvermə yolu ilə və iştirak edən üzvlərinin sayının sadə səs çoxluğu ilə qəbul olunur. Səslər bərabər olduqda komissiya sədrinin səsi həlledici sayılır.

5.5. Komissiyanın iclasının protokolu və qəbul olunmuş qərarlar iclasın keçirildiyi gündən sonrakı üç gün ərzində rəsmiləşdirilir, komissiyanın sədri və katibi tərəfindən imzalanır.

5.6. Komissiyanın üzvü qəbul olunmuş qərarla və ya bütövlükdə müəssisənin özəlləşdirmə planı ilə razı olmadıqda öz xüsusi rəyini yazılı surətdə komissiyanın sədrinə və komissiyanın iclasının protokolu ilə birlikdə Dövlət Əmlakı Nazirliyinə təqdim edir.

5.7. Komissiyanın fəaliyyəti onun sədri tərəfindən təşkil olunur.

Komissiyanın sədrinin aşağıdakı hüquqları vardır:

komissiyanın işinin təşkili və ona rəhbərlik etmək;

komissiyanın vəzifələrinin həyata keçirilməsi ilə əlaqədar olaraq onun üzvləri, komissiyanın işinə cəlb olunmuş şəxslər və özəlləşdirilən müəssisənin vəzifəli şəxsləri üçün məcburi sayılan göstərişlər vermək;

üzrsüz səbəblərə görə komissiyanın iclaslarında iki dəfədən artıq iştirak etməyən komissiya üzvünün onun tərkibindən çıxarılması barədə Dövlət Əmlakı Nazirliyi qarşısında məsələ qaldırmaq;

əmək kollektivinin Dövlət Əmlakı Nazirliyi tərəfindən qəbul edilən özəlləşdirmə çeklərinin silinməsində iştirak etmək.

5.8. Komissiyanın fəaliyyətinin təminatı özəlləşdirilən müəssisənin sərəncamında olan vəsait hesabına həyata keçirilir.

5.9. Özəlləşdirilən dövlət müəssisəsinin özəlləşdirmə planı və digər sənədlər Dövlət Əmlakı Nazirliyi tərəfindən təsdiq edildikdən və dövlət müəssisəsinin çevrilməsi nəticəsində yaradılan səhmdar cəmiyyətinin səhmlərinin 15 faizinin əmək kollektivinə dövlət özəlləşdirmə payları (çekləri) müqabilində güzəştli şərtlərlə satışı başa çatdıqdan sonra komissiyanın fəaliyyətinə xitam verilir.

 

 

Azərbaycan Respublikası Prezidentinin
2000-ci il 23 dekabr tarixli 432 nömrəli Fərmanı ilə

TƏSDİQ edİlmİşdİr

 

Yerli icra hakimiyyəti orqanlarının sərəncamında olan, habelə yaşayış binalarında yerləşib dövlət vəsaiti hesabına inşa edilmiş qeyri-yaşayış sahələrinin özəlləşdirilməsi
QAYDALARI

 

1. Bu Qaydalar "Dövlət əmlakının özəlləşdirilməsi haqqında" Azərbaycan Respublikası Qanununun və "Azərbaycan Respublikasında dövlət əmlakının özəlləşdirilməsinin II Dövlət Proqramı"nın (bundan sonra -II Dövlət Proqramı) həyata keçirilməsini təmin etmək məqsədi ilə hazırlanmışdır və yerli icra hakimiyyəti orqanlarının sərəncamında olan, habelə yaşayış binalarında yerləşib dövlət vəsaiti hesabına inşa edilmiş qeyri-yaşayış sahələrinin (bundan sonra - qeyri-yaşayış sahələri) özəlləşdirilməsi qaydalarını tənzimləyir.

2. Qeyri-yaşayış sahələrinə aşağıdakılar aiddir:

ayrıca tikilmiş qeyri-yaşayış binaları;

yaşayış binalarında yerləşən qeyri-yaşayış sahələri;

mənzil fondundan qeyri-mənzil fonduna keçirilmiş qeyri-yaşayış sahələri.

3. Bu Qaydalarda nəzərdə tutulan "ayrıca tikilmiş qeyri-yaşayış binaları" dedikdə "Azərbaycan Respublikasında mənzil fondunun özəlləşdirilməsi haqqında" Azərbaycan Respublikasının Qanunu ilə əhatə edilməyən sahələr və binalar nəzərdə tutulur.

4. Qeyri-yaşayış sahələrinin özəlləşdirilməsi aşağıdakı qaydada həyata keçirilir:

4.1. özəlləşdirilən dövlət müəssisələri (obyektləri) tərəfindən icarəyə götürülmüş və onlar tərəfindən istehsal, ticarət, ictimai-iaşə, məişət xidməti və digər məqsədlər üçün istifadə edilən qeyri-yaşayış sahələri qüvvədə olan qanunvericiliyə müvafiq olaraq həmin müəssisələr (obyektlər) ilə birlikdə özəlləşdirilir.

4.2. qeyri-dövlət hüquqi şəxsləri və ya fiziki şəxslər tərəfindən icarəyə götürülmüş (bundan sonra - icarəçi) qeyri-yaşayış sahələrinin özəlləşdirilməsi barədə ərizələr Azərbaycan Respublikasının Dövlət Əmlakı Nazirliyinə təqdim edilir.

Ərizəyə icarə müqaviləsinin surəti və aşağıdakı sənədlər əlavə olunur:

a) hüquqi şəxslər üçün:

hüquqi şəxsin nizamnaməsinin müəyyən edilmiş qaydada təsdiq olunmuş surəti;

hüquqi şəxsin dövlət qeydiyyatı haqqında şəhadətnaməsinin müəyyən edilmiş qaydada təsdiq olunmuş surəti;

qeyri-yaşayış sahəsinin texniki pasportu;

b) fiziki şəxslər üçün:

şəxsiyyəti təsdiq edən sənəd;

qeyri-yaşayış sahəsinin texniki pasportu.

Azərbaycan Respublikasının Dövlət Əmlakı Nazirliyi daxil olmuş müraciətə əsasən qeyri-yaşayış sahəsinin özəlləşdirilməsi haqqında iki həftə ərzində müvafiq qərar qəbul edir.

4.2.1. İcarəçi tərəfindən icarəyə götürülmüş qeyri-yaşayış sahələri ilk növbədə 100 faiz dəyəri ilə icarəçiyə təklif olunur. İcarəçi həmin sahəni almağa razılıq verdikdə onunla Azərbaycan Respublikasının Dövlət Əmlakı Nazirliyi arasında alqı-satqı müqaviləsi bağlanılır.

4.2.2. İcarəçi, ona müvafiq təklif edildikdən 1 ay ərzində həmin qeyri-yaşayış sahəsini 100 faiz dəyəri ilə almaqdan imtina etdikdə və ya bu müddət ərzində alqı-satqı müqaviləsi bağlamadıqda, obyekt Azərbaycan Respublikasının Dövlət Əmlakı Nazirliyi tərəfindən "Dövlət əmlakının hərraclar vasitəsi ilə satışı Qaydaları"na müvafiq olaraq özəlləşdirilir.

İcarə obyekti (qeyri-yaşayış sahəsi) bu bəndin 1-ci abzasında göstərilən hallarda özəlləşdirmə üçün açıq elan edildikdə və icarə müqaviləsi ləğv olunduqda mülkiyyət münasibətləri Azərbaycan Respublikasının Mülki Məcəlləsinə və "İcarə haqqında" Azərbaycan Respublikasının Qanununa müvafiq olaraq həll edilir.

5. İstifadədə olmayan qeyri-yaşayış sahələri bu Əsasnamənin 4.2.2.-ci yarımbəndində göstərilən qaydada özəlləşdirilir.

6. Qeyri-yaşayış sahələrinin alıcısı qismində "Dövlət əmlakının özəlləşdirilməsi haqqında" Azərbaycan Respublikasının Qanunu ilə müəyyən edilmiş dövlət əmlakının alıcıları çıxış edə bilərlər.

7. Qeyri-yaşayış sahələrinin qiymətləndirilməsi qüvvədə olan qanunvericiliyə müvafiq olaraq həyata keçirilir.

 

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TƏSDİQ edİlmİşdİr

 

Özəlləşdirilən dövlət əmlakının qiymətləndirilməsi haqqında
ƏSASNAMƏ

1. Bu Əsasnamə "Dövlət əmlakının özəlləşdirilməsi haqqında", "Müəssisələr haqqında", "Mühasibat uçotu haqqında", "Qiymətləndirmə fəaliyyəti haqqında" Azərbaycan Respublikasının qanunlarına, "Azərbaycan Respublikasında dövlət əmlakının özəlləşdirilməsinin II Dövlət Proqramı"na və digər normativ hüquqi aktlara uyğun olaraq hazırlanmışdır.

2. Bu Əsasnamə dövlət əmlakının özəlləşdirilməsi prosesində müəssisələrin start (satış) qiymətini və ya dövlət müəssisələrinin əsasında yaradılan səhmdar cəmiyyətlərinin nizamnamə kapitalını hesablamaq məqsədi ilə onların əmlakının qiymətləndirilməsi qaydalarını müəyyən edir.

3. Özəlləşdirilən müəssisənin start (satış) qiyməti və ya dövlət müəssisələrinin əsasında yaradılan səhmdar cəmiyyətinin nizamnamə kapitalı, onun qiymətləndirilən balans aktivinin dəyərindən balansın uyğun passiv maddələrinin dəyəri çıxılaraq alınmış ilkin qiymətə bu Əsasnamə ilə müəyyən edilmiş əmsallar tətbiq edilməklə hesablanır.

4. Dövlət müəssisələrinin özəlləşdirilməsi zamanı özəlləşdirilən əmlakın real qiymətləndirilməsini həyata keçirmək məqsədi ilə maliyyə məsləhətçiləri cəlb edildiyi hallarda qiymətləndirmənin beynəlxalq metod və üsullarından istifadə edilir.

5. Müəssisənin start (satış) qiyməti və ya səhmdar cəmiyyətinin nizamnamə kapitalı son hesabat tarixinə təsdiq edilmiş balans məlumatları əsasında aşağıdakı qayda ilə müəyyən edilir:

Sq= (A - P) x Max Zəx Xə x Gə

Burada: Sq - müəssisənin start (satış) qiyməti;

A - müəssisənin balans aktivlərinin ümumi dəyəri;

P- müəssisənin balans öhdəlikləri (passivləri);

Ma- müəssisənin maliyyə asılılığı əmsalı;

Zə - müəssisənin yerləşdiyi zona əmsalı;

Xə - müəssisənin yerli xammalla təchiz olunma əmsalı;

Gə - müəssisənin gəlirlilik əmsalıdır.

Müəssisənin maliyyə asılılığı əmsalı özəlləşdirmə tarixinə onun balansında olan kreditor borcların (büdcəyə, büdcədənkənar fondlara, ssuda, əmək haqqı, iş və xidmətlərə görə olan borclar) onun qiymətləndirilən aktivlərinin ümumi dəyərinə olan nisbəti kimi müəyyən edilir.

Müəssisənin zona əmsalı - onun yerləşdiyi əraziyə görə şərti müəyyən olunmuş əmsalıdır.

Müəssisənin yerli xammalla təchiz olunma əmsalı - onun yerli xammaldan (və ya idxal olunan xammaldan) asılılığını xarakterizə edir və istifadə olunan yerli xammal növlərinin (xammal, yarımfabrikat, komplektləşdirici məmulat və s.) ümumilikdə istifadə olunan xammal növlərinə olan nisbəti kimi müəyyən edilir.

Müəssisənin gəlirlilik əmsalı - onun nəzərdə tutulan rentabellik səviyyəsidir və proqnozlaşdırılan xalis gəlirin (mənfəətin) istehsal xərclərinə (və ya maya dəyərinə) olan nisbəti kimi müəyyən edilir.

Dövlət müəssisəsinin hüquqi şəxs olmayan struktur bölməsi (filial, istehsal sahəsi, sex və digər struktur bölmə) ayrıca özəlləşdirildikdə, qiymətləndirmə özəlləşdirmə anına olan öhdəliklərə uyğun tərtib olunmuş və baş müəssisə tərəfindən təsdiq edilmiş bölüşdürücü aktın (balansın) məlumatları əsasında aparılır.

6. Özəlləşdirilən dövlət müəssisəsinin (obyektinin) qiymətləndirilən əmlakının tərkibinə onun əsas vəsaitləri və sair dövriyyədənkənar aktivləri, ehtiyat və məsrəfləri, pul və sair maliyyə vəsaitləri, digər maddi və qeyri-maddi aktivləri daxildir.

7. Əsas vəsaitlərə və sair dövriyyədənkənar aktivlərə aşağıdakılar daxildir:

a) binalar, qurğular, ötürücü qurğular, iş-güc maşınları və avadanlıqları, ölçü tənzimləyici cihazlar (qurğular), hesablama texnikası, nəqliyyat vasitələri, alətlər, istehsalat-təsərrüfat inventarları (ləvazimatları), işçi-məhsuldar heyvanlar, çoxillik əkmələr, torpaqların yaxşılaşdırılmasına (meliorasiya, qurudulma, irriqasiya və s. işlər), habelə başqa işlərə qoyulan kapital qoyuluşları və başqa əmək vasitələri;

b) balansda əks olunan qeyri-maddi aktivlər, torpaq, su və təbii ehtiyatlardan (sərvətlərdən) istifadə hüquqları, əmlak hüquqları, patentlər, lisenziyalar, "nou-hau", proqram məhsulları, inhisar və imtiyaz (üstünlük) hüquqları (xüsusi fəaliyyət növünə verilən lisenziyalar da daxil olmaqla), təşkilati xərclər, ticarət markaları, əmtəə nişanları və digər qeyri-maddi aktivlər;

c) müəssisənin quraşdırılmamış avadanlıqları və başa çatdırılmamış əsaslı tikintisi;

ç) müəssisənin uzunmüddətli maliyyə qoyuluşları, o cümlədən digər müəssisələrin qiymətli kağızlarına (səhm, istiqraz və sair), dövlət və yerli borclar üzrə faizli istiqrazlara, ölkə ərazisində yaradılmış digər müəssisələrin nizamnamə fondlarına, müəssisənin xaricdəki kapitalına və sair uzunmüddətli maliyyə qoyuluşları;

d) müəssisə balansının aktivindəki "Əsas vəsaitlər və sair dövriyyədənkənar aktivlər" bölməsinin digər maddələri.

8. Ehtiyatlar və məsrəflər - istehsal ehtiyatları (xammal, yanacaq, ehtiyat hissələri, yarımfabrikat və komplektləşdirici məmulatlar, əsas və köməkçi materiallar, taralar və material ehtiyatları), azqiymətli və tez köhnələn əşyalar, bitməmiş istehsal, gələcək dövrün xərcləri, hazır məhsul, mallar və müəssisə balansının aktivindəki "Ehtiyatlar və məsrəflər" bölməsinin digər maddələrindən ibarətdir.

9. Pul vəsaitləri, hesablaşmalar və sair aktivlərə müəssisənin banklardakı hesablarında və kassasında olan pul vəsaitləri, yüklənmiş malların dəyəri, debitorlarla hesablaşmaları, qısamüddətli maliyyə qoyuluşları (bir ildən çox olmayan) və balansın aktivindəki "Pul vəsaitləri, hesablaşmalar və sair aktivlər" bölməsində əks etdirilən dövriyyə aktivlərindən ibarətdir.

10. Qiymətləndirilən əmlakın tərkibinə müəssisənin mühasibat uçotunda müxtəlif səbəblərdən əks etdirilməyən əmlak, müvəqqəti olaraq təmirdə və ehtiyatda olan əmlak, icarədə və ya müddətli istifadədə olan əmlak da daxil edilir.

11. Özəlləşdirilən dövlət müəssisəsinin (obyektinin) yerləşdiyi torpaq sahəsi bu Əsasnaməyə uyğun olaraq qiymətləndirilən əmlakın tərkibinə daxil edilmir və Azərbaycan Respublikasının müvafiq qanunvericiliyinə əsasən müəyyən edilmiş qaydada ayrıca özəlləşdirilir. Özəlləşdirilən torpaq sahəsinin qiymətləndirilməsi müvafiq normativ hüquqi aktlarla tənzimlənir.

12. Dövlət müəssisəsinin əmlakının icarəyə verilməsi yolu ilə yaradılmış icarə müəssisələrinin və icarəyə verilmiş əmlakın özəlləşdirilməsi zamanı qiymətləndirmə bu Əsasnaməyə uyğun olaraq aparılır.

İcarəçinin öz gəliri hesabına əldə etdiyi əmlakın tərkibi müvafiq sənədlər əsasında Azərbaycan Respublikasının qanunvericiliyinə uyğun olaraq Azərbaycan Respublikasının Dövlət Əmlakı Nazirliyi tərəfindən müəyyən edilir.

13. Müəssisənin balans öhdəliklərinə borc vəsaitləri və kreditlər, kreditorlarla hesablaşmalar, alıcı və sifarişçilərdən alınmış avanslar və sair cəlb edilmiş vəsaitlər daxildir.

Əmlakın tərkibindən çıxarılan balans passivlərinə qarşıdakı xərclər və ödəmələr üzrə ehtiyatlar, gələcək dövrün gəlirləri, şübhəli borclar üzrə ehtiyatlar və sair qısamüddətli passivlər də aiddir.

14. Özəlləşdirilən dövlət müəssisəsinin start (satış) qiyməti və ya səhmdar cəmiyyətinin nizamnamə kapitalı müəyyən edilərkən əmlakın tərkibindən bu Əsasnamənin 13-cü bəndində göstərilən passiv maddələri ilə yanaşı, qüvvədə olan qanunvericiliyə əsasən özəlləşdirilməsi qadağan olunmuş əmlakın, dövlət mülkiyyətində saxlanılan, habelə yerli özünüidarəetmə (bələdiyyə) orqanlarının və müvafiq təşkilatların balansına verilən sosial-mədəni və məişət-kommunal təyinatlı obyektlərin, habelə müəssisənin əmlak kompleksinin tərkibindən çıxarılaraq ayrıca özəlləşdirilən əmlakın dəyəri da çıxılır.

15. Özəlləşdirmə prosesində dövlət müəssisələrinin əmlakının bu Əsasnaməyə uyğun olaraq qiymətləndirilməsi müəssisə rəhbərliyinin iştirakı ilə özəlləşdirmə komissiyası tərəfindən müəssisənin əmlakının inventarlaşdırılması əsasında həyata keçirilir.

16. Əsas vəsaitlər qalıq dəyəri və ya bazar dəyəri ilə qiymətləndirilir. Əsas vəsaitin qalıq dəyəri onun balans dəyərindən (yenidən qiymətləndirmə nəzərə alınmaqla) əsas vəsaitlərin amortizasiya normaları əsasında qiymətləndirmə dövrünə hesablanmış köhnəlmə məbləği çıxılmaqla müəyyən edilir.

Bu qayda ilə hesablanmış qalıq dəyəri özəlləşdirmə komissiyası tərəfindən qiymətləndirmə dövründə eyni və ya analoji əsas vəsaitlərin bazar qiymətləri ilə müqayisə edilir. Əsas vəsaitlərin mühasibat uçotu məlumatları əsasında müəyyən edilmiş qalıq dəyəri bazar qiymətlərinə uyğun gəlmədikdə (aşağı və ya yuxarı olduqda), müəssisəni özəlləşdirmə komissiyası qiymətləndirmə və mühasibat uçotu haqqında. Azərbaycan Respublikasının qanunvericiliyinə əsasən təkrar qiymətləndirmə aparır və əsas vəsaitin bazar dəyərini müəyyən edir.

Əsas vəsaitin bazar dəyərini müəyyən etmək məqsədi ilə aparılan təkrar qiymətləndirmə müəssisə rəhbərinin və ya özəlləşdirmə komissiyasının təşəbbüsü ilə bu sahədə xüsusi razılığa (lisenziyaya) malik olan hüquqi və fiziki şəxslər (qiymətləndiricilər) tərəfindən həyata keçirilə bilər. Bu məqsədlə müəssisə ilə qiymətləndirici arasında "Qiymətləndirmə fəaliyyəti haqqında" Azərbaycan Respublikasının Qanununa uyğun olaraq müqavilə bağlanılır.

Qiymətləndiricilər (hüquqi və fiziki şəxslər) dövlət müəssisəsinin əmlakının düzgün qiymətləndirilməsinə görə Azərbaycan Respublikasının qanunvericiliyinə müvafiq olaraq məsuliyyət daşıyırlar.

17. Əsas vəsaitlərin bazar dəyəri ilə qiymətləndirilməsinə dair tərtib edilmiş aktlar, qiymətləndiricilərin xüsusi rəyi (hesabatı) əlavə edilməklə, özəlləşdirmə komissiyası tərəfindən Dövlət Əmlakı Nazirliyinə təqdim edilir.

Qiymətləndirmə aktları müəyyən olunmuş qaydada təsdiq edildikdən sonra qiymətləndirmənin nəticələri müəssisənin mühasibat və statistika uçotu və hesabatlarında düzəlişlər etmək üçün istifadə olunur.

18. Əsas vəsaitlərin balans dəyəri inventarlaşdırmanın nəticələri nəzərə alınmaqla mühasibat uçotu məlumatları (uçot kitabları, inventar kartları və s.) əsasında müəyyən edilir.

İnventarlaşdırma nəticəsində qalıq kimi aşkar edilmiş, lakin mühasibat uçotunda əks etdirilməyən əsas vəsaitlərin balans dəyəri onların hazırlanmasına, quraşdırılmasına və əldə edilməsinə çəkilən xərclər əsasında müəyyən edilir. Bu zaman qüvvədə olan tikinti-smeta normativləri, tikinti materiallarının bazar qiymətləri, müvafiq xidmətlərin tariflərini və həmin xərclərin bazar dəyərinin müəyyən edilməsinə imkan verən qiymət, tarif və digər amillər nəzərə alınır.

Müəssisənin balansında əks etdirilməyən bina, qurğu, maşın, avadanlıq və digər növ əsas vəsaitlərin hazırlanmasına və əldə edilməsinə çəkilən xərclər haqqında mühasibat uçotunda müvafiq məlumatlar olmadıqda, onların dəyəri özəlləşdirmə komissiyası tərəfindən qiymətləndirmə dövrünə olan bazar qiymətləri ilə müəyyən edilir.

19. Normativ istismar müddəti bitmiş, lakin istifadəyə yararlı olan əsas vəsaitlərin və ya onların ayrı-ayrı hissələrinin (detallarının, qovşaqlarının və s.) gələcəkdə istifadə olunmaq dərəcəsi nəzərə alınmaqla qalıq bərpa dəyəri müəyyən edilir. İstifadəyə yararlı olan əsas vəsaitlərin qalıq bərpa dəyəri fiziki aşınma vəziyyəti nəzərə alınmaqla müəssisənin özəlləşdirmə komissiyası tərəfindən qiymətləndirilir.

20. Başa çatdırılmamış tikinti obyektlərinin və quraşdırılmamış avadanlıqların özəlləşdirmə dövründə dəyəri bu Əsasnamənin 16-cı bəndində nəzərdə tutulmuş qaydada müəyyən edilir.

Özəlləşdirilməsi nəzərdə tutulan, tikintisi başa çatdırılmamış perspektivsiz obyektlər özəlləşdirmə komissiyası və ya qiymətləndirici tərəfindən onların tikintisinə sərf olunmuş yararlı tikinti materiallarının (konstruksiyalarının) bazar dəyəri nəzərə alınmaqla qiymətləndirilir. Bu zaman obyektin perspektivsizlik göstəricilərinin müəyyən edilməsi Azərbaycan Respublikası Nazirlər Kabineti tərəfindən təsdiq edilmiş qaydalara uyğun aparılır.

21. Azqiymətli və tez köhnələn əşyaların dəyəri onların balans dəyərindən hesablanmış köhnəlmə çıxılmaqla müəyyən edilir.

22. Uzunmüddətli maliyyə qoyuluşları balans dəyəri üzrə qiymətləndirilir.

23. Qeyri-maddi aktivlər onların balans dəyərindən köhnəlmə məbləği çıxılmaqla qiymətləndirilir.

24. Ehtiyatlar və məsrəflər mövcud vəziyyətə olan balans dəyəri ilə qiymətləndirilir.

25. Pul vəsaitləri, hesablaşmalar və sair dövriyyə aktivləri balans dəyəri ilə qiymətləndirilir.

26. Müəssisənin valyuta hesablarında olan pul vəsaitləri, valyuta ilə ödənilməsi nəzərdə tutulan debitor borcları qiymətləndirmə tarixinə manatın Azərbaycan Respublikası Milli Bankının müəyyən etdiyi məzənnəsi əsasında qiymətləndirilir.

27. Bu Əsasnaməyə uyğun olaraq müəssisənin hesablanmış ilkin qiymətinə tətbiq edilən əmsallar (bazar konyunkturu nəzərə alınmaqla) Dövlət Əmlakı Nazirliyinin təqdimatı ilə Azərbaycan Respublikasının Nazirlər Kabineti tərəfindən təsdiq edilir.

28. Özəlləşdirilən müəssisələr (obyektlər) bina və tikililərin bir hissəsində yerləşdikdə və mühasibat uçotunda həmin sahələrin balans dəyəri haqqında məlumatlar olmadıqda, onlara aid edilən sahələr (qeyri-yaşayış, istehsal və digər təyinatlı sahələr) aşağıdakı qaydada qiymətləndirilir:

Bq = Qd x Yə

burada Bq - bina və tikilinin bir hissəsində yerləşən sahənin start (satış) qiyməti;

Qd - bina və tikilinin bir hissəsində yerləşən sahənin qalıq dəyəridir;

Yə - bina və tikilinin bir hissəsində olan müəssisənin (obyektin) yerləşmə əmsalıdır.

Yaşayış binalarında və inzibati təyinatlı binalarda yerləşən qeyri yaşayış sahəsinin qalıq dəyəri (Qd) aşağıdakı düsturla müəyyən edilir:

Qd = K x Sü x Bə x Hə x Mə x Aə

K - 1m2 sahənin özəlləşdirmə zamanı qəbul edilən normativ dəyəridir;

Sü - müəssisə və obyektin yerləşdiyi ümumi sahədir və obyektin müəyyən olunmuş qaydada tərtib edilmiş texniki pasportunun göstəriciləri əsasında müəyyən edilir.

Bə - bina əmsalıdır;

Hə - hündürlük əmsalıdır;

Mə- mərtəbəlilik əmsalıdır;

Aə - bina və tikilinin köhnəlmə əmsalıdır.

Bina və tikilinin bir hissəsində yerləşən sahənin start (satış) qiymətinə tətbiq edilən əmsallar (bazar konyunkturu nəzərə alınmaqla) Dövlət Əmlakı Nazirliyinin təqdimatı ilə Azərbaycan Respublikasının Nazirlər Kabineti tərəfindən müəyyən edilir.

29. Bina və tikililərin bir hissəsində yerləşən dövlət müəssisə və obyektlərinin start (satış) qiyməti və ya səhmdar cəmiyyətinin nizamnamə kapitalı müəyyən edilərkən onlara aid olan sahələrin (qeyri-yaşayış, istehsal və digər təyinatlı sahələrin), bu Əsasnamənin 28-ci bəndinə uyğun olaraq hesablanmış qalıq dəyəri qiymətləndirilən əsas vəsaitlərin ümumi dəyərinə daxil edilir.

30. Müəssisənin özəlləşdirmə komissiyası tərəfindən əsas vəsaitlərin, mal-material qiymətlilərinin, başa çatdırılmamış tikililərin, quraşdırılmamış avadanlıqların, uzunmüddətli maliyyə qoyuluşlarının, qeyri-maddi aktivlərin, ehtiyat və məsrəflərin, xarici valyutada pul vəsaitlərinin (debitor borclarının) qiymətləndirilməsi aktları Dövlət Əmlakı Nazirliyinin müəyyən etdiyi formalarda tərtib olunur.

31. Özəlləşdirilən dövlət müəssisəsinin özəlləşdirmə komissiyası tərəfindən təqdim olunmuş əmlakın inventarlaşdırılması və qiymətləndirilməsi aktları müəyyən edilmiş qaydada ekspertiza edildikdən sonra Dövlət Əmlakı Nazirliyi tərəfindən təsdiq olunur.

Dövlət müəssisəsinin rəhbəri, baş mühasibi və özəlləşdirmə komissiyasının üzvləri Dövlət Əmlakı Nazirliyinə təqdim edilən əmlakın inventarlaşdırılması və qiymətləndirilməsi aktlarının, habelə digər özəlləşdirmə sənədlərinin dürüstlüyü üçün Azərbaycan Respublikasının qanunvericiliyinə uyğun məsuliyyət daşıyırlar.

32. Müəssisənin özəlləşdirmə sənədlərinə (özəlləşdirmə planına) qanunvericiliklə özəlləşdirilməsi qadağan olunmuş obyektlərin, müəssisənin balansında olan və özəlləşdirmədən sonra dövlət mülkiyyətində saxlanılan, habelə yerli özünüidarəetmə (bələdiyyə) orqanlarının və müvafiq təşkilatların balansına verilən sosial-mədəni və məişət-kommunal təyinatlı obyektlərin, habelə müəssisənin əmlak kompleksinin tərkibindən çıxarılaraq ayrıca özəlləşdirilən obyektlərin siyahısı əlavə edilir.

33. Dövlət müəssisəsinin (obyektinin) əmlakının qiymətləndirilməsi aktları təsdiq edildiyi gündən onun özəlləşdirilməsi barədə alqı-satqı müqaviləsi bağlananadək və ya səhmlərin nəzarət zərfi satılanadək əsas vəsaitlərin silinməsi və özgəninkiləşdirilməsi yalnız mövcud qanunvericiliyə uyğun həyata keçirilə bilər.

34. Müəssisə rəhbərliyi əmlakın (səhmlərin və ya hissələrin) satışa çıxarıldığı tarixə müəssisənin start (satış) qiyməti və ya səhmdar cəmiyyətinin nizamnamə kapitalı hesablanarkən qiymətləndirmə aktlarında göstərilmiş əmlakın tərkibində (dəyərində) baş vermiş dəyişikliklər barədə Dövlət Əmlakı Nazirliyinə zəruri məlumatları təqdim etməlidir.

35. Bu Əsasnamənin tələblərinə riayət edilməsi Azərbaycan Respublikası ərazisində yerləşən bütün dövlət müəssisələri üçün məcburidir və həmin tələblərin pozulması özəlləşdirilən əmlakı qiymətləndirilməsinin etibarsız hesab edilməsi üçün əsasdır.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TƏSDİQ edİlmİşdİr

 

Açıq tipli səhmdar cəmiyyətinə çevrilən dövlət müəssisələrinin səhmlərinin əmək kollektivinə güzəştli satışı haqqında
ƏSASNAMƏ

I. Ümumİ müddəalar

1.1. Bu Əsasnamə "Dövlət əmlakının özəlləşdirilməsi haqqında", "Səhmdar cəmiyyəti haqqında" Azərbaycan Respublikası qanunlarına və "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır və açıq tipli səhmdar cəmiyyətinə çevrilən dövlət müəssisələrinin səhmlərinin əmək kollektivinə və onlara bərabər tutulan şəxslərə güzəştli satışının həyata keçirilməsi qaydalarını müəyyən edir.

1.2. Səhmlərin güzəştli satışı həmin səhmlərin özəlləşdirmə çeklərinə dəyişdirilməsini nəzərdə tutur.

1.3. Səhmlərin güzəştli satışını özəlləşdirilən müəssisədə yaradılan özəlləşdirmə komissiyası həyata keçirir.

II. Səhmlərİ güzəştlİ almaq hüququ olan şəxslər

2.1. "Dövlət əmlakının özəlləşdirilməsi haqqında" Azərbaycan Respublikasının Qanununa və II Dövlət Proqramına uyğun olaraq dövlət müəssisəsinin özəlləşdirilməsi zamanı səhmləri güzəştli almaq hüququ aşağıdakılara aid edilir:

əsas iş yeri həmin müəssisə hesab edilən işçilərə;

Azərbaycan Respublikasının qanunvericiliyinə müvafiq olaraq həmin müəssisədə əvvəlki iş yerinə qayıtmaq hüququ olan şəxslərə;

özəlləşdirmənin müəssisədə 7 (yeddi) ildən çox çalışmış və həmin müəssisədən pensiyaya çıxmış şəxslərə;

1995-ci il yanvarın 1-dən sonra işçilərin sayı və ştatların ixtisarı nəticəsində işdən azad olunmuş və işsiz statusu almış şəxslərə.

III. Güzəştlə satılan səhmlərİn ümumİ həcmİ

Əmək kollektivinə və onlara bərabər tutulan şəxslərə güzəştli satışa yönəldilən səhmlərin həcmi II Dövlət Proqramına müvafiq olaraq səhmdar cəmiyyətinin səhmlərinin 15 faizi həcmində müəyyən olunur.

IV. Səhmlərİn güzəştlİ satışı qaydaları

4.1. Səhmdar cəmiyyəti dövlət qeydiyyatına alındıqdan və səhmləri buraxıldıqdan sonra müəssisəni özəlləşdirmə komissiyası özəlləşdirmə haqqında qərar qəbul etmiş orqanın müəyyən etdiyi vaxtda səhmlərin güzəştli şərtlərlə satışının təşkilinə başlamağa borcludur.

Səhmlərin güzəştli satışı haqqında məlumat satışın keçirildiyi gündən azı 30 (otuz) gün əvvəl komissiya tərəfindən Dövlət Əmlakı Nazirliyinin rəsmi mətbu orqanı olan "Mülkiyyət" qəzetində dərc olunmalıdır.

Məlumatda aşağıdakılar göstərilməlidir:

səhmlərin güzəştli satışı qaydaları və müddəti;

səhmdar cəmiyyətinin nizamnamə kapitalı;

güzəştlə satılan səhmlərin ümumi sayı;

güzəştli satışda iştirak etmək hüququ olan şəxslərin sayı;

səhmin nominal dəyəri;

sifarişlərin verilmə qaydası.

Səhmlərin güzəştli satışı 25 (iyirmi beş) gün müddətində başa çatmalıdır.

4.2. Səhmlərin güzəştli satışı aşağıdakı qaydada həyata keçirilir:

müəssisənin özəlləşdirmə komissiyası tərəfindən səhmləri güzəştli satın almaq hüququ olan şəxslərin tam siyahısı tərtib edilir;

işçilərin hər birinin özəlləşdirmə komissiyasına təqdim edəcəkləri özəlləşdirmə çeklərinin sayı müəyyənləşdirilir. Bunun üçün son 2 (iki) ixtisaslaşdırılmış çek hərraclarında satılmış ümumi dövlət əmlakının dəyəri həmin hərraclarda təqdim edilmiş özəlləşdirmə çeklərinin sayına bölünməklə bir özəlləşdirmə çekinin qiyməti müəyyən edilir. Güzəştli satışa çıxarılmış səhmlərin məcmu nominal dəyərini çeklərin qiymətinə bölməklə təqdim ediləcək özəlləşdirmə çeklərinin ümumi sayı, həmin sayı işçilərin sayına bölməklə hər bir işçinin bərabər sayda təqdim edəcəyi çeklərin sayı müəyyən edilir. Hesablamalar zamanı yuvarlaqlaşdırmalar ümumi qaydada həyata keçirilir;

güzəştli satış özəlləşdirmə haqqında rəsmi elan günündən etibarən 25 (iyirmi beş) gün ərzində keçirilir və özəlləşdirmə komissiyası tərəfindən təqdim edilmiş sənədlər əsasında güzəştli satışın yekunlarına əsasən bölüşdürülmüş səhmlərin sayı müəyyən edilir;

güzəştli satışa çıxarılan səhmlərin əmək kollektivinin güzəştli satışda iştirak etməmiş və qismən iştirak etmiş üzvlərinin sayına mütənasib hissəsi (bütünlükdə əmək kollektivi üzvləri və onlara bərabər tutulan şəxslər güzəştli satışdan imtina etdiyi halda səhmlərin hamısı) Dövlət Əmlakı Nazirliyinin qərarı ilə özəlləşdirmə planına uyğun olaraq digər satış üsulları ilə özəlləşdirilir;

müəssisənin özəlləşdirmə komissiyasının təqdim etdiyi sənədlər əsasında güzəştli satışın yekunlarını təsdiq etmək üçün həmin satışda iştirak etmiş şəxslərin ümumi yığıncağı keçirilir və yığıncağın protokolu Dövlət Əmlakı Nazirliyinə təqdim edilir;

sənədlər Dövlət Əmlakı Nazirliyi tərəfindən qəbul edildikdən sonra təqdim edilmiş özəlləşdirmə çekləri özəlləşdirmə komissiyasının sədrinin və üzvlərinin iştirakı ilə silinir. Özəlləşdirmə çeklərinin silinməsi onların sağ tərəfindəki kötüklərinin (dəlik açılmış hissələrin) kəsilməsi yolu ilə həyata keçirilir.

V. Güzəştlİ satışın yekunu haqqında protokol

5.1. Güzəştli satış başa çatdıqdan sonra özəlləşdirmə komissiyası bu haqda protokol tərtib edir. Protokolda güzəştli satışın keçirilməsi müddəti, bir səhmin nominal dəyəri, səhmlərin ümumi sayı, güzəştli satışda iştirak edən iştirakçıların siyahısı və onların hər birinə düşən səhmlərin sayı, güzəştli satışa çıxarılan və satılmayan səhmlərin sayı və nominal dəyəri haqqında məlumat əks olunur. Protokol komissiyanın sədri və üzvləri tərəfindən imzalanır və təsdiq olunmaq üçün Dövlət Əmlakı Nazirliyinə təqdim olunur.

VI. Səhmlərə mülkİyyət hüququnun rəsmİləşdİrİlməsİ

6.1. Dövlət Əmlakı Nazirliyi təsdiq edilmiş güzəştli satışın yekunu haqqında protokolun əsasında işçilərə müvafiq sayda səhmlərə mülkiyyət hüququnu təsdiq edən bildiriş verir.

Bildirişə əsasən Milli Depozit Mərkəzi müvafiq sayda səhmlərə mülkiyyət hüququnu təsdiq edən, səhmdar cəmiyyətin reyestrindən çıxarışı səhmdarlara verir.

Güzəştlə satılan səhmin sahibi reyestrdən çıxarışı aldıqdan sonra öz səhmini özgəninkiləşdirə bilər.

6.2. Dövlət Əmlakı Nazirliyi güzəştli satışın nəticələri haqqında məlumatı hərracın keçirildiyi gündən 15 (on beş) gün müddətində Dövlət Əmlakı Nazirliyinin rəsmi mətbu orqanı olan "Mülkiyyət" qəzetində dərc etdirir.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TƏSDİQ edİlmİşdİr

 

İcarəyə verilmiş dövlət əmlakının özəlləşdirilməsi haqqında
ƏSASNAMƏ

1. Bu Əsasnamə Azərbaycan Respublikasının Mülki Məcəlləsinə, "İcarə haqqında" və "Dövlət əmlakının özəlləşdirilməsi haqqında" Azərbaycan Respublikasının qanunlarına, "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır və icarəyə verilmiş dövlət əmlakının özəlləşdirilməsi qaydalarını müəyyən edir.

2. II Dövlət Proqramı təsdiq edilənədək müəyyən olunmuş qaydada qeydə alınmayan icarə müqavilələri əsasında fəaliyyət göstərən icarəçilər müəssisənin özəlləşdirilməsi prosesində II Dövlət Proqramında müəyyən edilmiş güzəşt hüquqlarını itirirlər.

3. II Dövlət Proqramı təsdiq edilənədək icarə müqaviləsinə müvafiq olaraq satınalma hüququ ilə icarəyə verilmiş dövlət əmlakının özəlləşdirilməsi tərəflər arasında bağlanmış icarə müqavilələrinin şərtlərindən (satınalma hüququndan, icarə müddətindən və s.) asılı olaraq müxtəlif üsullarla həyata keçirilir.

4. İcarəyə verilmiş dövlət əmlakının özəlləşdirilməsi üzrə ərizələr icarə müqaviləsi və hüquqi şəxsin nizamnaməsi əlavə olunmaqla icarəçilər tərəfindən Azərbaycan Respublikası Dövlət Əmlakı Nazirliyinin yerli qurumlarına verilir. Dövlət Əmlakı Nazirliyinin yerli qurumları həmin ərizələri icarə müqaviləsinin şərtləri, müəssisələrin təşkilati-hüquqi forması və qanunvericiliklə dövlət əmlakının özəlləşdirilməsinə dair müəyyən edilmiş digər tələbləri nəzərə almaqla, onların özəlləşdirilməsi üsullarına dair təklifləri Dövlət Əmlakı Nazirliyinə təqdim edir.

5. İcarəyə verilmiş dövlət müəssisələrinin (obyektlərinin) özəlləşdirilməsi haqqında qərarlar II Dövlət Proqramının 2.2-ci və 2.3-cü bəndlərində müəyyən edilmiş təsnifatdan asılı olaraq müvafiq icra hakimiyyəti orqanları tərəfindən qəbul edilir.

6. İcarəyə verilmiş dövlət əmlakının qiymətləndirilməsi qüvvədə olan qanunvericiliyə müvafiq olaraq aparılır.

7. İcarəyə verilmiş dövlət əmlakının tərkibi və həcmi icarə müqaviləsi əsasında, həmçinin icarə müqaviləsi qüvvədə olan müddət ərzində dövlət əmlakının silinməsi və satılması halları Dövlət Əmlakı Nazirliyi tərəfindən yoxlanılır və qanun pozuntuları aşkar edildikdə, qanunvericiliklə nəzərdə tutulmuş qaydada lazımi tədbirlər həyata keçirilir.

8. İcarə obyekti özəlləşdirmə üçün açıq elan olunduqda, icarə müqaviləsi ləğv edilmiş hesab olunur və mülkiyyət münasibətləri Azərbaycan Respublikasının Mülki Məcəlləsinə və "İcarə haqqında" Azərbaycan Respublikasının Qanununa müvafiq olaraq tənzimlənir.

9. İcarəçinin icarəyə götürdüyü əmlakdan istifadə nəticəsində əldə etdiyi məhsul və gəlir, habelə icarəyə götürülmüş əmlakdan alınan gəlir hesabına əldə etdiyi əmlak onun mülkiyyətidir və özəlləşdirilən əmlakın tərkibinə daxil edilmir.

Bu bəndin birinci abzasında göstərilən əmlakın tərkibi qanunvericiliyə müvafiq olaraq Dövlət Əmlakı Nazirliyi tərəfindən müəyyən edilir.

10. İcarəyə götürülmüş sahədə icarəyəverənin razılığı olmadan icarəçinin vəsaiti hesabına inşa olunmuş və aparılması mümkün olmayan tikililər və qurğular icarəyəverənə məxsusdur və özəlləşdirilən dövlət əmlakının tərkibinə daxil edilir və bu tərkibdə qiymətləndirilir.

11. "İcarə haqqında" Azərbaycan Respublikasının Qanunu qüvvəyə minənədək mövcud qanunvericilik aktlarına müvafiq satınalma hüququ ilə bağlanmış icarə müqavilələri əsasında icarəyə verilmiş əmlakın icarəçisi tərəfindən satın alınması halları Dövlət Əmlakı Nazirliyi tərəfindən yoxlanılır və qanun pozuntuları aşkar edilmədikdə, müvafiq hüquqi və fiziki şəxslərə, onların mülkiyyət hüququnu təsdiq edən şəhadətnamə verilir (şəhadətnamənin forması əlavə olunur).

Bu bəndin birinci abzasında göstərilən hallarda qanun pozuntuları aşkar edildikdə, Dövlət Əmlakı Nazirliyi qanunvericiliyə müvafiq qaydada məhkəmədə iddia qaldırır.

12. İcarəyə verilmiş dövlət əmlakı özəlləşdirilmək məqsədi ilə açıq tipli səhmdar cəmiyyətinə çevrildiyi halda onun səhmləri satılmaq üçün ilk növbədə icarəçiyə təklif olunur.

13. II Dövlət Proqramı qəbul edilənədək bağlanmış və müvafiq qaydada Dövlət Əmlakı Nazirliyində qeydiyyatdan keçmiş icarə müqaviləsi əsasında fəaliyyət göstərən müəssisələr aşağıdakı qaydada özəlləşdirilir:

13.1. orta və iri müəssisənin səhmləri aşağıdakı nisbətdə satılır:

15 faizi əmək kollektivinə güzəştli satılır;

30 faizi nominal dəyəri ilə ilk növbədə icarəçiyə təklif olunur;

55 faizi ixtisaslaşdırılmış çek hərracında satılır.

13.2. Kiçik müəssisələrin dəyərinin (obyektin start qiymətinin) 15 faizi əmək kollektivinə güzəştli satışa yönəldilir, 85 faizi isə ilkin start qiyməti ilə ilk növbədə icarəçiyə təklif olunur.

14. İcarəçilər icarə müəssisəsinin satışa çıxarılmış və ilk növbədə onlara təklif olunan səhm zərfini və ya nizamnamə kapitalı hissəsini almaqdan imtina etdikdə, həmin müəssisələr müvafiq olaraq II Dövlət Proqramının 5.8-ci bəndində və 6.1-ci bəndində göstərilmiş qaydada özəlləşdirilir.

15. Bu Əsasnamənin 13-cü bəndində göstərilən hallar istisna olmaqla, bağlanmış digər icarə müqavilələri əsasında icarə müəssisələri II Dövlət Proqramında nəzərdə tutulmuş qaydada özəlləşdirilirlər.

16. İcarə müəssisəsinin struktur bölməsinin ayrıca özəlləşdirilməsi haqqında qərar həmin bölmənin ayrıca fəaliyyət göstərməsi, onun texnoloji cəhətdən müəssisə ilə bağlılığı, ərazi baxımından ayrılmasının mümkünlüyü və sair belə amillər nəzərə alınmaqla, Dövlət Əmlakı Nazirliyi tərəfindən qəbul edilir. Bu qərar qəbul edildikdə, icarəyə götürülmüş əmlak 100 faiz dəyəri ilə icarəçiyə təklif olunur. İcarəçilər icarəyə götürdükləri əmlakı almaqdan imtina etdikdə, həmin əmlak II Dövlət Proqramında nəzərdə tutulmuş qaydada özəlləşdirilir.

17. Özəlləşdirilən dövlət müəssisələri (obyektləri) tərəfindən istehsal, ticarət, ictimai-iaşə, məişət xidməti və digər məqsədlər üçün icarəyə götürülmüş qeyri-yaşayış sahələri həmin müəssisələrlə (obyektlərlə) birgə özəlləşdirilir.

18. Özəlləşdirilməsi qadağan olunan dövlət əmlakı istisna olmaqla, icarə müqavilələri əsasında icarəyə verilmiş digər dövlət əmlakı (tikili, qurğu, avadanlıq və s.) onun icarəyə verən müəssisə və ya təşkilatla bağlılığı, ərazi baxımından ayrılmasının mümkünlüyü və sair belə amillər nəzərə alınmaqla, Dövlət Əmlakı Nazirliyi tərəfindən aşağıdakı qaydada özəlləşdirilir:

icarəyə verilmiş əmlak 100 faiz dəyəri ilə icarəçiyə təklif olunur. İcarəçi icarəyə götürdüyü əmlakı almağa razılıq verdikdə, onunla alqı-satqı müqaviləsi bağlanır və o, 30 (otuz) gün ərzində əmlakın dəyərini ödəyir;

icarəçi icarəyə götürdüyü əmlakı almaqdan imtina etdikdə və ya həmin təklifi aldığı andan 30 (otuz) gün ərzində əmlakın dəyərini ödəmədikdə, həmin əmlak II Dövlət Proqramının 4.4-cü bəndində nəzərdə tutulmuş qaydada hərraca çıxarılır və ya müəssisə ilə birlikdə özəlləşdirilir.

19. İcarəçilər tərəfindən alınmış dövlət əmlakı üzərində mülkiyyət hüququ Dövlət Əmlakı Nazirliyi tərəfindən verilən mülkiyyət hüququ haqqında şəhadətnamə ilə rəsmiləşdirilir.

20. Dövlət Əmlakı Nazirliyi hərracın nəticələri haqqında məlumatı hərracın keçirildiyi gündən 15 (on beş) gün müddətində onun rəsmi mətbu orqanı olan "Mülkiyyət" qəzetində dərc etdirir.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli
Fərmanı ilə təsdiq edilmiş

"İcarəyə verilmiş dövlət əmlakının

özəlləşdirilməsi haqqında Əsasnamə"yə
Əlavə

Azərbaycan Respublikasının Dövlət Əmlakı Nazirliyi Dövlət əmlakının hüquqi və fiziki şəxslərə satılması haqqında
ŞƏHADƏTNAMƏ

Əmlak üzərində mülkiyyət hüququnu təsdiq edən bu şəhadətnamə vərilir____________________________________________________________________
(hüquqi şəxsin adı,
________________________________________________________________________
müəssisənin rəhbərinin, fiziki şəxsin S.A.A.)
ona görə ki, o (onlar) həqiqətən _______________________________________________
________________________________________________________________________
(alınmış əmlakın ünvanı və adı)
qüvvədə olan qanunvericilik əsasında satın almışdır.
Alınmış əmlakın tərkibi: _____________________________________________________
________________________________________________________________________
Əmlakın ümumi satış qiyməti:
manat ___________________________________________________________________
(sözlə)
Dövlət əmlakının alınması nəticəsində hesablaşma hesabı__________________________
ünvanlı Dövlət büdcəsinə ____________________________________________________
(sözlə)
manat məbləğində pul köçürülmüşdür.
Bu şəhadətnamə ilə rəsmiləşdirilən həmin

________________________________________________________________________
(obyektin adı) (hüquqi şəxsin adı və ya fiziki şəxsin S.A.A.)
daimi toxunulmaz mülkiyyətidir.
Reyestr kitabı ________________________
səhifə_________________________________
qeydiyyat ____________________________
tarix___________________________________
Nazir:
M.Y.
Qeydiyyat icraçısı: _________________ __________________

 

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TӘSDİQ edİlmİşdİr

 

Dövlət özəlləşdirmə opsionları haqqında
ƏSASNAMƏ

1. Dövlət özəlləşdirmə opsionlarının buraxılışı, tədavülü, istifadəsi və dövriyyədən çıxarılması qaydaları "Dövlət əmlakının özəlləşdirilməsi haqqında" Azərbaycan Respublikasının Qanunu və "Azərbaycan Respublikasında dövlət əmlakının özəlləşdirilməsinin II Dövlət Proqramı" (bundan sonra - II Dövlət Proqramı), digər normativ hüquqi aktlar və bu Əsasnamə ilə tənzimlənir.

2. Dövlət özəlləşdirmə opsionları (bundan sonra - özəlləşdirmə opsionu) xarici sərmayəçiyə dövlət əmlakının özəlləşdirilməsində dövlət özəlləşdirmə çeklərindən istifadə etmək hüququ verən, nağdsız formada buraxılan adlı qiymətli kağızdır.

3. Özəlləşdirmə opsionlarının buraxılışı, tədavülü və istifadəsi qaydaları qanunvericiliyə uyğun olaraq Azərbaycan Respublikasının Prezidenti yanında Qiymətli Kağızlar üzrə Dövlət Komitəsi (bundan sonra - QKDK) tərəfindən həyata keçirilir.

4. Xarici sərmayəçilər çek investisiya fondlarının fəaliyyətində normativ hüquqi aktlarla müəyyən edilmiş qaydada və yalnız özəlləşdirmə opsionları vasitəsi ilə iştirak edə bilərlər.

5. Özəlləşdirmə opsionları QKDK tərəfindən qanunvericiliyə uyğun olaraq müəyyən edilmiş qiymətə satılır və onun qiyməti barədə məlumat hər ay mətbuatda dərc olunur.

6. Qanunvericiliyə müvafiq olaraq xarici sərmayəçi hesab olunan xarici fiziki şəxs və vətəndaşlığı olmayan şəxs tərəfindən özəlləşdirmə opsionu alındıqda, həmin şəxslər onların şəxsiyyətini təsdiq edən sənəd təqdim etməlidirlər.

7. Qanunvericiliyə müvafiq olaraq xarici sərmayəçi hesab olunan xarici hüquqi şəxs (nəzarət səhm zərfi və ya nizamnamə kapitalının 100 faizi xarici sərmayəçilərə məxsus olan) özəlləşdirmə opsionu aldıqda həmin hüquqi şəxsin səlahiyyətli nümayəndəsi etibarnamə təqdim etməlidir.

Zəruri hallarda QKDK tərəfindən bu bəndin birinci abzasında göstərilən xarici sərmayəçilər tərəfindən digər sənədlərin təqdim edilməsi da müəyyən edilə bilər (təsis sənədləri və s.).

8. Hər özəlləşdirmə opsionu bir çek almaq hüququ verir.

9. Xarici sərmayəçilər ixtisaslaşdırılmış hərraclarda özəlləşdirmə opsionları təqdim etməklə iştirak edirlər.

10. Özəlləşdirmə opsionlarının (özəlləşdirmə çekləri ilə birlikdə) tədavüldən çıxarılması, silinməsi və ləğv edilməsi özəlləşdirməyə nəzarət üzrə Dövlət Komissiyasının nəzarəti ilə Azərbaycan Respublikasının Dövlət Əmlakı Nazirliyi tərəfindən həyata keçirilir.

11. Özəlləşdirmə opsionlarının emissiyasından əldə edilən vəsaitlər dövlət büdcəsinə mədaxil olunur.

12. Özəlləşdirmə opsionları 2002-ci il yanvarın 1-dək tədavüldədir.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TӘSDİQ edİlmİşdİr

 

Dövlət müəssisələrinin fərdi layihələr üzrə özəlləşdirilməsi
QAYDALARI

1. Ümumİ müddəalar

1.1. Bu Qaydalar "Dövlət əmlakının özəlləşdirilməsi haqqında" və "Tender haqqında" Azərbaycan Respublikasının qanunlarına, "Azərbaycan Respublikasında dövlət əmlakının özəlləşdirilməsinin II Dövlət Proqramı"na müvafiq olaraq hazırlanmışdır və ölkə iqtisadiyyatı üçün böyük əhəmiyyət kəsb edən dövlət müəssisələrinin fərdi layihələr üzrə özəlləşdirilməsi qaydalarını müəyyən edir.

1.2. Dövlət müəssisələrinin fərdi layihələr üzrə özəlləşdirilməsi - ölkə iqtisadiyyatı üçün böyük əhəmiyyət kəsb edən dövlət müəssisələrinin fərdi layihələr üzrə özəlləşdirməyə hazırlanmasını, onların restrukturizasiyasını (o cümlədən borclarının restrukturizasiyasını), qiymətləndirilməsini və bilavasitə satışını əhatə edən tədbirlər kompleksidir.

Fərdi layihələr üzrə özəlləşdirmə zamanı dövlət müəssisəsinin bazasında yaradılmış səhmdar cəmiyyətlərinin səhmlərinin 51 faizi və ya daha çox hissəsi tender əsasında pul vəsaitinə strateji sərmayəçiyə satılır.

1.3. Dövlət müəssisələrinin fərdi layihələr üzrə özəlləşdirilməsi zamanı maliyyə məsləhətçisi cəlb oluna bilər. Maliyyə məsləhətçisinin xidmət haqqının ödənilməsi özəlləşdirmədən əldə edilən pul vəsaitindən nəzərdə tutulan ayırmalar hesabına həyata keçirilir.

1.4. Fərdi layihələr üzrə özəlləşdirilən dövlət müəssisələrinin satıcısı kimi Azərbaycan Respublikasının Dövlət Əmlakı Nazirliyi (bundan sonra -DƏN) çıxış edir.

2. Dövlət müəssİsələrİnİn fərdİ layİhələr üzrə özəlləşdİrİlməsİnİn əsas mərhələlərİ

2.1. Dövlət müəssisələrinin fərdi layihələr üzrə özəlləşdirilməsinin əsas mərhələləri aşağıdakılardır:

müəssisələrin fərdi layihələr üzrə özəlləşdirilməsi və zəruri hallarda bu məqsədlə maliyyə məsləhətçisinin cəlb edilməsi barədə əsaslandırılmış təkliflərin Azərbaycan Respublikasının Prezidentinə təqdim olunması;

müvafiq qərar qəbul edildikdən sonra müəssisənin iqtisadi və maliyyə vəziyyətinin təhlili, onun qiymətləndirilməsi və səhmlərinin satış nisbəti barədə təkliflərin hazırlanması;

müəssisənin özəlləşdirmə planının (emissiya prospektinin) DƏN tərəfindən təsdiq olunması;

özəlləşdirmə planına uyğun dövlət müəssisəsinin satışının həyata keçirilməsi.

2.2. Fərdi layihələr üzrə özəlləşdirilən müəssisələrin səhmlərinin satışı nisbəti Azərbaycan Respublikasının Prezidenti tərəfindən müəyyən edilir.

Fərdi layihələr üzrə özəlləşdirilən müəssisələrin səhmlərinin 15 faizi müəssisənin əmək kollektivi üzvlərinə və onlara bərabər tutulan şəxslərə güzəştli satışa yönəldilir.

2.3. Tender keçirilən zaman DƏN tərəfindən iddiaçılar qarşısında maliyyə-iqtisadi, sosial, ekoloji və sair şərtlər qoyula bilər.

3. Malİyyə məsləhətçİsİnİn seçİlməsİ qaydaları

3.1. Zəruri hallarda, qəbul edilmiş qərara uyğun olaraq fərdi layihələr üzrə özəlləşdirmə prosesinə DƏN tərəfindən maliyyə məsləhətçisi cəlb oluna bilər.

3.2. Maliyyə məsləhətçisinin seçilməsi DƏN tərəfindən Azərbaycan Respublikasının qanunvericiliyinə uyğun olaraq tender əsasında həyata keçirilir.

Tenderin qalibini müəyyən edərkən tender komissiyası tərəfindən üstünlük ən əlverişli şərtlər təklif etmiş və bu şərtlərin həyata keçirilməsi üçün ən peşəkar imkanlara malik olan məsləhətçiyə (məsləhətçilərə) verilir. Bu zaman əsas meyarlardan biri ən ucuz xidmət haqqı (qiymət) təklifi hesab olunur.

3.3. Maliyyə məsləhətçisi aşağıdakı peşəkar tələblərə cavab verməlidir:

ən azı 3 (üç) fərdi layihənin həyata keçirilməsində uğurlu iştirak təcrübəsinə malik olmalıdır;

onun satışında özəlləşdirilən dövlət müəssisəsinin aid olduğu sahədə özəlləşdirmənin həyata keçirilməsi təcrübəsinə malik olan şəxslər olmalıdır.

3.4. Maliyyə məsləhətçisinin əsas vəzifələri aşağıdakılardır:

özəlləşdirilən müəssisənin hərtərəfli təhlili (iqtisadi və maliyyə təhlili, məlumat memorandumunun hazırlanması);

müəssisənin bazar qiymətinin müəyyən edilməsi, səhmlərinin satışı nisbəti və qaydalarına dair təkliflərin hazırlanması;

strateji sərmayəçilərin seçilməsi meyarlarının hazırlanması;

özəlləşdirmə prosesinə strateji sərmayəçilərin cəlb edilməsi və onlara özəlləşdirilən müəssisə haqqında məlumatların verilməsi üçün müvafiq "məlumat bankı"nın yaradılması;

səhmlərin strateji sərmayəçiyə satışı məqsədilə keçirilən tenderin qalibinin seçilməsi üçün müvafiq şərtlər toplusunun və meyarların hazırlanmasında DƏN-nə yardım göstərilməsi;

səhmlərin strateji sərmayəçiyə satışı məqsədilə keçirilən tenderin qalibi ilə imzalanacaq alqı-satqı müqaviləsinin hazırlanmasında DƏN-ə yardım göstərilməsi.

3.5. Səhmlərin satışının nəticələrinə görə maliyyə məsləhətçisi alıcı tərəfindən "müvəffəqiyyətə görə ödəniş" prinsipi əsasında mükafatlandırıla bilər.

4. Dövlət əmlakının satışı üzrə tenderİn keçİrİlməsİ qaydası

4.1. Tenderin keçirilməsi məqsədilə DƏN tərəfindən komissiya yaradılır və onun iş reqlamenti təsdiq olunur.

4.2. Tender komissiyası 7 (yeddi) nəfərdən ibarət olmaqla Azərbaycan Respublikasının Dövlət Əmlakı Nazirliyi tərəfindən aşağıdakı mərkəzi icra hakimiyyəti orqanlarının nümayəndələrindən ibarət formalaşdırılır:

Azərbaycan Respublikasının İqtisadiyyat Nazirliyi - 1 nəfər;

Azərbaycan Respublikasının Maliyyə Nazirliyi - 1 nəfər;

Azərbaycan Respublikasının Vergilər Nazirliyi - 1 nəfər;

Azərbaycan Respublikasının Antiinhisar Siyasəti və Sahibkarlığa Kömək Komitəsi - 1 nəfər;

Azərbaycan Respublikasının Dövlət Əmlakı Nazirliyi - 3 nəfər.

4.3. Tenderin Keçirilməsi "Tender haqqında" Azərbaycan Respublikasının Qanununa müvafiq olaraq həyata keçirilir.

5. Yekun müddəalar

5.1. Mülkiyyət hüququ alıcıya alqı-satqı müqaviləsində müəyyən edilmiş məbləğ tam ödənildikdən sonra keçir.

5.2. DƏN tenderin nəticələrinə müvafiq olaraq satılmış səhmlər üzərində mülkiyyət hüququnu təsdiq edən sənədi alıcıya verir.

5.3. Dövlət müəssisələrinin fərdi layihələr üzrə özəlləşdirilməsi zamanı yaranan mübahisələr Azərbaycan Respublikasının qanunvericiliyinə uyğun olaraq həll edilir.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TƏSDİQ edİlmİşdİr

 

Dövlət əmlakının hərraclar vasitəsi ilə satışı
QAYDALARI

1. Ümumİ müddəalar

1.1. Bu Qaydalar "Dövlət əmlakının özəlləşdirilməsi haqqında" Azərbaycan Respublikasının Qanununa, "Azərbaycan Respublikasında dövlət əmlakının özəlləşdirilməsinin II Dövlət Proqramı"na müvafiq olaraq hazırlanmışdır və dövlət әmlakının hərraclar vasitəsi ilə satışının keçirilməsi qaydalarını, alıcıların hərracda iştirak etməsi və hesablaşma şərtlərini, qaliblərin müəyyənləşdirilməsi və özəlləşdirilən əmlaka mülkiyyət hüququnun rəsmiləşdirilməsi qaydalarını müəyyən edir.

1.2. Hərraclar vasitəsi ilə dövlət əmlakının satışı özəlləşdirilən əmlak barəsində alıcıdan hər hansı bir şərtin yerinә yetirilməsi tələb olunmadan özəlləşdirmədə alıcı kimi tanınan fiziki və hüquqi şəxslərin mülkiyyətinə qanunvericiliklə müəyyən edilmiş qaydada özgəninkiləşdirilməsidir.

Bu zaman əmlak üzərində mülkiyyət hüququ hərracın gedişində maksimum qiymət təklif etmiş alıcıya verilir. Alıcı əmlakın hərrac dəyərini pulla ödəyir.

1.3. Özəlləşdirilən dövlət əmlakının satıcısı kimi Azərbaycan Respublikasının Dövlət Əmlakı Nazirliyi (bundan sonra - Satıcı) çıxış edir.

2. Hərracların keçİrİlməsİnə hazırlıq

2.1. Satıcı hərraca hazırıq mərhələsində:

hərrac gününə ən azı 30 (otuz) gün qalmış hərrac haqqında məlumatın Satıcının rəsmi mətbu orqanı olan "Mülkiyyət" qәzetindә dərc olunmasını təmin edir;

hərracların keçirilməsi üzrə komissiya təşkil edir və zəruri hallarda onun işinə müstəqil ekspertlər cəlb edir;

əmlakı hərraca çıxarılan müəssisə və obyektin, dövlətə məxsus səhmin start qiymətini müvafiq qaydada müəyyən edir;

hərracın iştirakçıları ilə hesablaşmalar aparır;

hərraclarda iştirak etmək istəyən şəxslərdən sifarişləri və ona əlavə olunmuş sənədləri qəbul edir, onların qeydiyyatını aparır.

2.2. Hərracların keçirilməsi haqqında məlumatda aşağıdakılar öz əksini tapmalıdır:

hərracın keçirilməsi forması;

hərraca çıxarılan əmlakın tam adı, hüquqi ünvanı və ya yerləşdiyi ünvan;

müəssisənin, obyektin və ya onların səhmlərinin start qiyməti;

özəlləşdirilən müəssisənin (obyektin) yerləşdiyi torpaq sahəsi və onun üzərində yerləşən tikililərin xarakteristikası, onların öhdəliklərlə yüklənməsi (əgər mövcuddursa);

müəssisənin digər müәssisәlәrdә iştirak payının (səhmlər, hissələr) həcmi;

qeyri-maddi aktivlər (patent, ticarət markası və s.);

müəssisənin öhdəlikləri (müqavilə, büdcə, kredit və digər öhdəlikləri);

müəssisənin buraxdığı məhsulların (işlərin, xidmətlərin) əsas çeşidi;

işçilərin sayı;

müəssisənin ekoloji vəziyyəti;

buraxılmış səhmlərin nominal dəyəri;

müəssisənin səhmlərinin satışı üsulu;

səhmlərin satışına qoyulan məhdudiyyətlər (bu cür məhdudiyyətlər müəyyən edilmişsə);

satışa çıxarılan səhmlərin ümumi miqdarı və növü;

bir səhmin nominal dəyəri;

sifarişlərin qəbulunun başlanma və başaçatma tarixləri;

sifariş və sənəd qəbulu məntəqələrinin ünvanları (zərurət olduqda mərtəbə, otaq, telefon nömrəsi, qəbul saatları göstərilməklə);

hərraclarda iştirak etmək üçün sifarişçilərin sifariş ilə birlikdə verəcəkləri sənədlərin siyahısı və onların tərtib edilməsi üçün irəli sürülən tələblər;

hərracların keçirilməsi tarixi, vaxtı və ünvanı;

satıcı və komissiyanın qərargahının telefon nömrələri və ünvanı;

ilkin satış qiymətinin 10 faizi həcmində hesablanan behin məbləği və behin keçirilməsi üçün müvafiq bank hesabı;

alıcıları maraqlandıran digər məlumatları almaq qaydası.

2.3. Məlumatın dərc olunduğu gündən hərracda iştirak etmək üçün sifariş vermiş şəxslərə satışa çıxarılan əmlak ilə qabaqcadan tanış olmaq imkanı yaradılır.

3. Hərraclarda İştİrak etmə şərtlərİ

3.1. Hərraca qanunvericiliyə müvafiq olaraq alıcı hesab edilən, sifariş və digər zəruri sənədləri hәrracın başlanmasına ən geci üç bank günü qalanadək təqdim etmiş və özəlləşdirmə obyektinin ilkin satış qiymətinin 10 faizi həcmində beh keçirmiş hüquqi və fiziki şəxslər buraxılırlar.

3.2. Hərraclarda iştirak etmək üçün sifarişçi satıcının müəyyən etdiyi formada sifariş təqdim edir. Sifarişin və ona əlavə edilən sənədlərin qəbulu dərc olunmuş məlumatda göstərilən müddətdə həyata keçirilir.

3.3. Hərracda iştirak etmək istəyən şəxslər sifarişə aşağıdakı sənədləri əlavə edirlər:

satıcı tərəfindən müəyyən edilmiş hesaba behin köçürülməsini təsdiq edən ödəmə sənədinin surəti;

hüquqi şəxslər üçün təsis sənədlərinin müəyyən olunmuş qaydada təsdiq edilmiş surətləri;

fiziki şəxslər üçün şəxsiyyəti təsdiq edən sənədin surəti.

3.4. Hərraclarda iştirak etmək üçün sifariş hüquqi və fiziki şəxsin nümayəndəsi tərəfindən verildiyi təqdirdə o özünün sifarişçisi adından hərəkət etmək hüququnu təsdiq edən sənəd təqdim etməlidir.

3.5. Sifariş və ona əlavə edilmiş sənədlər satıcı tərəfindən qəbul edilib qeydiyyata alınır və bunun müqabilində hərracda iştirak etmək üçün buraxılmış şəxslərə onların hərracda iştirak etmə nömrəsi, satışa çıxarılan əmlakın adı əks olunan bilet verilir. Bilet verildiyi andan sifarişçi hərrac iştirakçısı statusu alır.

3.6. Sifarişçi aşağıdakı hallarda hərraclarda iştirak etməyə buraxılmır:

sifariş vermiş şəxs qanunvericiliyə müvafiq olaraq alıcı kimi tanınmadıqda;

sifarişçinin nümayəndəsinin səlahiyyəti qanunvericiliklə müəyyən edilmiş qaydada təsdiq edilmədikdə;

hərracın keçirilməsi haqqında məlumatda göstərilən siyahı üzrə sənədlər tam şəkildə təqdim olunmadıqda, yaxud onlar lazımi qaydada tərtib edilmədikdə;

beh satıcının hesabına sifarişdə göstәrildiyindәn az həcmdə və ya müəyyən edilmiş müddətdən gec köçürüldükdə.

3.7. Hərracların keçirilməsi haqqında məlumatda göstərilən müddət başa çatdıqdan sonra hərraclarda iştirak etmək üçün daxil olan sifarişlər və onlara əlavə edilmiş sənədlər satıcı tərəfindən qəbul olunmur.

3.8. Satıcı hərraclarda iştirak etmək üçün sifarişçilərin verdikləri sifarişlərin və əlavə sənədlərin qorunub saxlanmasını təmin edən tәdbirlәr görür.

4. HərracIn keçİrİlməsİ qaydası

4.1. Hərracın keçirilməsi məqsədilə satıcı tərəfindən komissiya yaradılır və onun iş reqlamenti təsdiq olunur. Komissiya 5 (beş) nəfərdən ibarət olmaqla onun tərkibinə satıcının, satışa çıxarılan əmlakın yerləşdiyi ərazi üzrə yerli icra hakimiyyəti orqanının, yerli maliyyə və ədliyyə orqanlarının nümayəndələri daxil edilir. Komissiyanın sədri satıcının nümayəndələrindən təyin olunur.

4.2. Komissiya:

hərracın keçirilməsini təmin edir;

hәrrac iştirakçılarının qeydiyyatını aparır və bu barədə müvafiq məlumatı hazırlayıb satıcıya təqdim edir;

hərracın gedişində mübahisəli vəziyyət yarandıqda, hərracı dayandırır və bu barәdә satıcıya müvafiq məlumat verir;

hərracın qalibini müəyyən edir;

hərracın yekun və digər protokollarını rəsmiləşdirir və onu təsdiq etmək üçün satıcıya təqdim edir;

satıcı tərəfindən ona tapşırılmış digər vəzifələri yerinə yetirir.

4.3. Komissiyanın qərarları iclasda iştirak edən komissiya üzvlərinin sadə səs çoxluğu ilə qəbul edilir. Səsvermədə hər bir komissiya üzvü bir səsə malikdir. Komissiyanın üzvlərinin azı üçdə ikisi iclasda iştirak edərsə, komissiya öz səlahiyyətinə aid olan məsələləri həll etmək hüququna malikdir. Səslər bərabər olduqda komissiya sədrinin səsi həlledici hesab olunur. Komissiyanın işində mütəmadi olaraq iştirak etməyən və ya onun reqlamentini pozan üzvün komissiya üzvlüyündən çıxarılmasına dair satıcı məsələ qaldıra bilər. Bu halda həmin şəxs digər şəxslə əvəz olunur. Komissiyanın qərarları protokollaşdırılır və iclasda iştirak etmiş bütün komissiya üzvləri tərəfindən imzalanır.

4.4. Hərrac aşağıdakı qaydada həyata keçirilir:

hərracı satıcı tərəfindən muzdla tutulmuş hәrracçı aparır;

hərrac müəssisənin (obyektin) və səhmin qısa xarakteristikası və ilkin satış qiymətinin elan olunması ilə başlanır. Satış qiyməti elan olunduqdan sonra hərrac iştirakçıları öz biletlərini qaldırmaqla elan olunmuş qiymətə müəssisəni (obyekti) və ya səhmi almağa razı olduqlarını bildirirlər;

ilkin satış qiyməti iştirakçılar tərəfindən əlavə etmə yolu ilə artırılır. Hər yeni təklif ilkin satış qiymətinin 1 faizindən az olmamalıdır;

hәrracı yeni satış qiymətini üç dəfə təkrar edir. Təklif olunmuş qiymətə dair digər alıcılardan heç biri biletini qaldıraraq münasibətini bildirmədikdə, hərrac başa çatmış hesab edilir. Ən yüksək qiyməti təklif etmiş iştirakçı hərracın qalibi sayılır. Hәrracı müəssisənin (obyektin) və ya səhmin (səhm zərfinin) satıldığını, satış qiymətini və qalibin biletinin nömrəsini elan edir;

ilkin qiymət 3 (üç) dəfə elan olunduqdan sonra alıcılardan heç biri biletini qaldırmazsa, hərrac baş tutmamış hesab olunur və müəssisə (obyekt), səhm satıcıya qaytarılır;

özəlləşdirilən müəssisələrin (obyektlərin), səhmlərin hərracda satışı zamanı alıcı kimi hüquqi və fiziki şəxs, o cümlədən əmək kollektivi hərracın yeganə iştirakçısı olarsa, bu halda müəssisə (obyekt) və səhmlər həmin şəxsə, qanunvericiliklə müəyyən edilmiş qaydada, start qiyməti ilə, yaxud hərrac şərtləri ilə müəyyənləşən qiymətlə satılır.

hərrac başa çatdıqdan sonra hərrac komissiyası hərracın yekunlarını protokollaşdırır. Hərracın nəticələrinə görə yekun protokolu iki nüsxədə tərtib edilir, hərraca yekun vurulan gün iclasda iştirak edən komissiya üzvləri tərəfindən imzalanır və təsdiq olunmaq üçün satıcıya verilir. Həmin protokol 3 (üç) gün müddətində satıcı tərəfindən təsdiq edilir. Protokol 2 (iki) nüsxədə alıcı və ya onun nümayəndəsi, komissiyanın sədri və üzvləri tərəfindən imzalanır. Protokolda satıcı və alıcı haqqında məlumatlar, özəlləşdirilən müəssisənin (obyektin) və səhmin adı, axırıncı satış qiyməti, habelə alqı-satqı müqaviləsini imzalamaq haqqında tərəflərin öhdəlikləri əks olunur. Hərracın yekunları haqqında protokolun bir nüsxəsi alıcıya verilir. Bu protokol obyekt üzrə alqı-satqı müqaviləsi bağlanması üçün alıcının hüququnu təsdiq edən sənəddir. Hərracın qalibi hərrac başa çatdıqdan sonra həmin gün hərracın yekunları haqqında protokola imza etməlidir;

hərrac baş tutmadığı hallarda onun yekunu protokollaşdırılır və protokolda müəssisənin (obyektin) və səhmin satıcıya qaytarılması qeyd edilir;

hərracın qalibi hərrac başa çatdığı gün onun yekunları haqqında protokolu imzalamadıqda hərracın nəticələri ləğv edilir, keçirilmiş beh geri qaytarılmır, müəssisə və obyekt satıcının sərəncamında qalır.

4.5. Kiçik müəssisələrin özəlləşdirilməsi zamanı kiçik müəssisənin nizamnamə kapitalının 85 faizi hərraca satışa çıxarılır. Kiçik müəssisənin hərraca çıxarılan hissəsinin (müəssisənin nizamnamə kapitalının, obyektin start qiymətinin 85 faizinin) qalibi əmək kollektivi olduqda, bu hissə 100 faiz hesab edilməklə:

hərrac qiymətinin 30 faizi üzrə müvafiq qaydada alqı-satqı müqaviləsi bağlandıqdan sonra ən geci 5 (beş) bank günü ərzində vəkil olunmuş şəxs tərəfindən pulla ödənilir;

hərrac qiymətinin 30 faizi üzrə ödənişi həyata keçirən alıcılara hərrac qiymətinin 30 faizi hәcmindә güzəşt edilir (bu hissə əmək kollektivi üzvləri arasında bərabər bölüşdürülməklə əvəzsiz verilir);

40 faiz alqı-satqı müqaviləsində müəyyənləşən müddətdə, lakin 2 (iki) ildən gec olmayaraq vəkil olunmuş şəxs tərəfindən ödənilir.

4.6. Dövlət əmlakının satışı üzrə keçirilən ilk iki hərracda sifariş verilmədikdə (və ya əmlak satılmadıqda), satıcı tәrәfindәn üçüncü hərracda həmin әmlakın start qiyməti ilkin start qiymətinin 10 faizi həcmində, dördüncü hərracda ilkin start qiymətinin 25 faizi həcmində, beşinci hәrracda ilkin start qiymətinin 50 faizi həcmində aşağı salınır. Bu qaydada satılmayan dövlət müəssisələri müəyyən olunmuş qaydada ləğv edilir və onun əmlakı (tikililər, avadanlıq, qurğular və sair) ayrı-ayrılıqda yuxarıda göstәrilәn qaydada hərrac vasitəsi ilə satılır.

4.7. Hərracın nəticələri hərracın keçirildiyi gündən 15 (on beş) gün müddətində Satıcısının rəsmi mətbu orqanı olan "Mülkiyyət" qəzetində dərc olunur. Bu məlumatda aşağıdakılar göstərilir:

4.7.1. satılmış kiçik müəssisələr və obyektlər üzrə:

hərraca satışa çıxarılmış müəssisənin (obyektin) yerləşdiyi ünvan;

hərracın nәticәlәrinә görə dövlət büdcəsinə ödənilməli olan pul vəsaitinin məbləği;

hərracın digər iştirakçıları ilə hesablaşmaların aparılması qaydası və müddəti.

4.7.2. satılmış səhmlər üzrə:

səhmdar cәmiyyәtinin tam və qısaldılmış adı və hüquqi ünvanı;

buraxılmış səhmlərin ümumi sayı;

satışa çıxarılmış səhm zərfinin nominal dəyəri və satış qiyməti;

satılmış səhmlərin ümumi miqdarı.

5. Hərracın nətİcələrİ üzrə əqdlərİn bağlanılması

5.1. Satıcı və alıcı arasında hərracın yekunları haqqında protokol imzalandığı andan 10 (on) təqvim günü ərzində qüvvədə olan qanunvericiliyə müvafiq olaraq alqı-satqı müqaviləsi imzalanmalıdır. Alıcı göstərilən müddətdə müqaviləni imzalamaqdan imtina etdikdə onun tәrәfindәn ödənilmiş beh geri qaytarılmır və tam məbləğdə dövlət büdcəsinə köçürülür.

5.2. Hərracın yekunları üzrə bağlanmış alqı-satqı müqaviləsində aşağıdakılar göstərilir:

satılmış müəssisənin (obyektin) adı və ya səhm zərfinin həcmi;

obyektin alınma qiyməti;

alıcı haqqında məlumatlar və onun ünvanı;

obyektin verilməsi qaydası, ödənişin forma və müddətləri.

5.3. Hərracın qalibi müqavilənin bağlandığı andan ən geci 5 (beş) bank günü müddətində ödənilməli olan pul vəsaitini satıcının müəyyən etdiyi hesaba köçürür.

5.4. Müəyyən olunmuş müddətdə alıcı qeyd olunan məbləği ödəmədiyi halda alqı-satqı müqaviləsi qüvvədən düşmüş hesab edilir və keçirilmiş beh geri qaytarılmır və tam məbləğdə dövlət büdcəsinə köçürülür.

5.5. Hərracda müəssisənin (obyektin) və səhmin satışı üçün ödənilmiş beh satılan müəssisənin (obyektin) və səhmin satış qiymətinə daxil edilir. Hərracın digər iştirakçılarının ödəmiş olduqları beh satıcı tərəfindən təqdim edilmiş siyahılar üzrə hərrac iştirakçısının tələbi ilə 10 (on) bank günü müddətində geri qaytarılır.

5.6. Satıcı hərracın nəticələri haqqında məlumatı hərracın keçirildiyi gündən 15 (on beş) gün müddətində Satıcının rəsmi mətbu orqanı olan "Mülkiyyət" qəzetində dərc etdirir, müəssisənin maliyyə-təsərrüfat vəziyyəti haqqında sənədləri, alqı-satqı müqaviləsi rəsmiləşdirildikdən sonra isə mülkiyyət haqqında şəhadətnaməni alıcıya verməli, habelə alqı-satqı müqaviləsində göstərilən digər öhdəlikləri yerinə yetirməlidir.

6. Özəlləşdİrmə əqdlərİnİn etİbarsız hesab edİlməsİ

Özəlləşdirmə əqdləri Azərbaycan Respublikasının qanunvericiliyi ilə müəyyən olunmuş qaydada və hallarda etibarsız hesab edilir.

 

Azərbaycan Respublikası Prezidentinin
2000-ci il 23 dekabr tarixli 432 nömrəli Fərmanı ilə

TӘSDİQ edİlmİşdİr

 

Dövlət əmlakının ixtisaslaşdırılmış çek və pul hərraclarında satışı
Qaydaları

1. Ümumİ müddəalar

1.1. Bu Qaydalar "Dövlət əmlakının özəlləşdirilməsi haqqında" Azərbaycan Respublikasının Qanununa, "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) müvafiq olaraq hazırlanmışdır və özəlləşdirmə prosesində yaradılmış səhmdar cəmiyyətlərinin səhmlərinin və ya səhm zərflərinin ixtisaslaşdırılmış çek və pul hərracları vasitəsi ilə satışının keçirilməsinin ümumi qaydalarının, alıcıların hərraclarda iştirak etməsi və hesablaşma şərtlərini, qaliblərin müəyyənləşdirilməsi və özəlləşdirilən əmlaka mülkiyyət hüququnun rəsmiləşdirilməsi qaydalarını müəyyən edir.

1.2. Dövlət əmlakının ixtisaslaşdırılmış çek və pul hərraclarında satışı özəlləşdirmə prosesində yaradılmış səhmdar cəmiyyətlərinin səhmlərinin və ya səhm zərflərinin sifarişlər əsasında dövlət özəlləşdirmə payları (çekləri) və ya pul müqabilində özgəninkiləşdirilməsidir.

1.3. Özəlləşdirmə prosesində, qanunvericiliklə müəyyən edilmiş qaydada dövlət müəssisəsinin səhmdar cəmiyyətinə çevrilməsi nəticəsində yaradılmış səhmdar cəmiyyəti dövlət qeydiyyatına alındıqdan və səhmləri buraxıldıqdan sonra 30 (otuz) gün müddətində II Dövlət Proqramı ilə nəzərdə tutulmuş qaydada səhmdar cəmiyyətinin səhmlərinin ixtisaslaşdırılmış çek hərraclarında satılması barəsində satıcı tərəfindən qərar qəbul edilir.

Özəlləşdirmə çekləri tədavüldən çıxarıldığı andan ixtisaslaşdırılmış çek hərracları və dövlət müəssisələrinin işçilərinə güzəştlə satılmaq üçün nəzərdə tutulmuş, lakin satılmamış səhmlər ixtisaslaşdırılmış pul hərraclarında satılır.

1.4. Özəlləşdirilən dövlət əmlakının satıcısı kimi Azərbaycan Respublikasının Dövlət Əmlakı Nazirliyi (bundan sonra - DƏN) çıxış edir.

2. İxtİsaslaşdırılmış çek və pul hərraclarının keçİrİlməsİnə hazırlıq

2.1. DƏN:

hərrac gününə ən azı 30 (otuz) gün qalmış hərrac haqqında məlumatın DƏN-in rəsmi mətbu orqanı olan "Mülkiyyət" qəzetində dərc olunmasını təşkil edir;

hərracların keçirilməsi üzrə komissiya təşkil edir və zəruri hallarda onun işinə müstəqil ekspertlər cəlb edir;

hərracın iştirakçıları ilə hesablaşmalar aparır;

hərraclarda iştirak etmək istəyən şəxslərdən sifarişləri qəbul edir, onların qeydiyyatını aparır.

2.2. Hərracların keçirilməsi haqqında məlumatda aşağıdakılar göstərilməlidir:

səhmləri hərraca çıxarılan səhmdar cəmiyyətinin tam adı, hüquqi ünvanı;

səhmdar cəmiyyətinin nizamnamә kapitalının məbləği;

buraxılan səhmlərin və hərracda satılan səhmlərin ümumi miqdarı;

bir səhmin nominal dəyəri;

səhmləri satışa çıxarılan səhmdar cəmiyyətinin əsas fəaliyyət (iş, xidmət) növləri;

pul vəsaitinin köçürülməsinin forması, müddəti, qaydaları və sifarişçilər tərəfindən pul vəsaitinin köçürüləcəyi hesabların rekvizitləri;

sifarişlərin qəbulunun başlanma və başa çatma tarixləri;

sifariş və sənəd qəbulu məntəqələrinin ünvanları (mərtəbə, otaq, telefon nömrəsi, qəbul saatları göstərilməklə);

hərraclarda iştirak etmək üçün sifarişçilərin sifarişlə birlikdə verəcəkləri sənədlərin siyahısı və onların tərtib edilməsinə dair tələblər;

hәrracların keçirilməsi tarixi, vaxtı və yeri;

DƏN-in və komissiyanın qərargahının telefon nömrələri və ünvanı;

ixtisaslaşdırılmış pul hərracının keçirilməsi barәdә elan dərc olunduqda, əlavə olaraq pul vəsaitinin keçirilməsi üçün müəyyən edilmiş hesab;

qanunvericilikdə nəzərdə tutulmuş digər məlumatlar.

2.3. Məlumatın dərc olunduğu gündən hərracda iştirak etmək üçün sifariş vermiş şəxslərə satışa çıxarılan əmlakla qabaqcadan tanış olmaq imkanı yaradılır.

3. İXTİSASLAŞDIRILMIŞ çek və pul hərraclarında İştİrak etmə şərtlərİ

3.1. Hərraclarda iştirak etmәk üçün qanunvericiliyə müvafiq olaraq dövlət əmlakının alıcısı kimi tanınan, hərraclarda iştirak etmək üçün vaxtında sifariş vermiş, hərracların keçirilməsinə dair dərc olunan məlumatdakı sənədləri lazımi qaydada tərtib və təqdim etmiş fiziki və hüquqi şəxslər (bundan sonra - sifarişçi) buraxılır,

3.2. Hərraclarda iştirak etmək üçün sifarişçi satıcının müəyyən etdiyi formada sifarişi tərtib edir. Sifarişin və ona əlavə edilən sənədlərin qəbulu dərc olunmuş məlumatda göstərilən tarixdən həyata keçirilir.

3.3. Hərracda iştirak etmək istəyən şəxslər sifarişə aşağıdakı sənədləri əlavə etməlidirlər:

satışa çıxarılan səhmlərin dəyərinin ödənilməsi (pul və ya özəlləşdirmə çekləri ilə) haqda sifariş;

hüquqi şəxslər üçün təsis sənədlərinin müəyyən olunmuş qaydada təsdiq edilmiş surətləri;

fiziki şəxslər üçün şəxsiyyəti təsdiq edən sənədin surəti;

səhmlərin dəyəri özәllәşdirmә çekləri ilə ödənildikdə - özəlləşdirmə çekləri;

ixtisaslaşdırılmış pul hərraclarında pul vəsaitinin DƏN-in müəyyən etdiyi hesaba ödənildiyini təsdiq edən sənəd.

Hərraclarda iştirak etmək üçün sifariş hüquqi və ya fiziki şəxsin nümayəndəsi tərəfindən verildiyi təqdirdə o özünün sifarişçi adından hərəkət etmək hüququnu təsdiq edən etibarnamə təqdim etməlidir.

Sifariş və ona əlavə edilmiş sənədlər DƏN tərəfindən qəbul edilib qeydiyyata alınır və bunun müqabilində qəbz verilir.

3.4. Hərracların keçirilməsi haqqında məlumatda sifarişlərin qəbulu üçün göstərilən müddət başa çatdıqdan sonra hәrraclarda iştirak etmək üçün daxil olan sifarişlər və onlara əlavə edilmiş sənədlər satıcı tərəfindən qəbul olunmur.

3.5. Sifarişlər 5 (beş) gün müddәtindә qəbul edilir.

3.6. Sifarişçi aşağıdakı hallarda hərraclarda iştirak etməyə buraxılmır:

sifariş vermiş şəxs qanunvericiliyә müvafiq olaraq alıcı kimi tanınmadıqda;

sifarişçinin nümayəndəsinin səlahiyyəti qanunvericiliklə müəyyən edilmiş qaydada təsdiq edilmədikdə;

hərracın keçirilməsi haqqında məlumatda göstərilən siyahı üzrə sənədlər tam şəkildə təqdim olunmadıqda, yaxud onlar düzgün tərtib edilmədikdə.

3.7. İxtisaslaşdırılmış çek hərracında bir özәllәşdirmә çekinə düşəcək səhm üçün sifarişçi tərəfindən minimum hədd qoyulmadıqda sifariş 1-ci növ, belə hədd qoyulduqda isə 2-ci növ sifariş adlanır.

İxtisaslaşdırılmış pul hərracında 1-ci növ sifarişçi ödədiyi məbləğə görə düşəcək səhmlərin miqdarına aşağı hədd qoymur, 2-ci növ sifarişçi isə almaq istədiyi səhmlərin minimum miqdarını sifarişində göstərir.

İxtisaslaşdırılmış pul hәrracının iştirakçısı tərəfindən təqdim edilən sifarişdə səhmlərin dəyərini ödəmək üçün təklif edilən pul vəsaitinin məbləği 10 000 (on min) manat və ya bu məbləğin 2 və daha çox tam mislinə bərabər olmalıdır.

3.8. DƏN hərraclarda iştirak etmək üçün sifarişçilərin verdikləri sifariş və əlavə sənədlərin qorunub saxlanılmasını, həmçinin sifariş vermiş şəxslərin sənədlərinin vəziyyəti, eləcə də onların ödənişləri haqqında məlumatın gizli saxlanılmasını təmin edən tədbirlər həyata keçirir.

4. Hərracların keçİrİlməsİ qaydası

4.1. Hərracların keçirilməsi məqsədi ilə DƏN tərəfindən komissiya yaradılır və onun iş reqlamenti təsdiq olunur.

4.2. Komissiya:

hərracın keçirilməsini təmin edir;

hərrac iştirakçılarının qeydiyyatını aparır və bu barədə müvafiq məlumatı hazırlayıb DƏN-ə təqdim edir;

hərracın gedişində mübahisəli vəziyyət yarandıqda hərracı dayandırır və bu barədə DƏN-ə müvafiq məlumat verir;

hərracın qalibini müəyyən edir;

hərracın yekun və digər protokollarını rəsmiləşdirir və onu təsdiq etmək üçün DƏN-ə təqdim edir;

DƏN tərəfindən müəyyən edilmiş digər vəzifələri yerinə yetirir.

4.3. Komissiyanın qərarları iclasda iştirak edən komissiya üzvlərinin sadə səs çoxluğu ilə qəbul edilir. Səsvermədə hər bir komissiya üzvü bir səsə malikdir. Komissiyanın üzvlərinin azı üçdə ikisi iclasda iştirak edərsə, komissiya öz səlahiyyətinə aid olan məsələləri həll etmək hüququna malikdir. Səslər bərabər olduqda, komissiya sədrinin səsi həlledicidir. Komissiyanın hərraclar haqqında qərarları protokollaşdırılır və iclasda iştirak etmiş bütün komissiya üzvləri tərəfindən imzalanır.

4.4. İxtisaslaşdırılmış çek hərraclarında satışa çıxarılmış səhmlərin 95 faizindən az olmayan hissəsi satılmalıdır. Bunun üçün zəruri hallarda səhmlərin bölünməsi, yəni satışa çıxarılmış səhmlərin ümumi nominal dəyərini dəyişdirmədən, bir səhmin eyni nominallı daha kiçik səhmlərə bölünməsi əməliyyatı həyata keçirilə bilər.

5. İxtİsaslaşdırılmış çek hərraclarının keçİrİlməsİ qaydası

5.1. İxtisaslaşdırılmış çek hərracı aşağıdakı qaydada keçirilir:

komissiya hərracın məzənnəsini (satış qiymətini), yəni səhm/çek nisbətini müəyyən edir;

1-ci növ bütün sifarişlər ödənilir;

satış qiymətindən aşağı qiymət göstərilmiş bütün 2-ci növ sifarişlər ödənilir;

satış qiymətinə bərabər qiymət göstərilmiş 2-ci növ sifarişlər 5.7-çi bənddə müəyyən olunmuş qaydada ödənilir;

satış qiymətinə bərabər qiymətdən yüksək qiymət göstərilmiş 2-ci növ sifarişlər hərracdan çıxarılır.

5.2. Sifarişləri ödənilmiş bütün iştirakçılar hərracın qalibi sayılırlar.

5.3. Hərracın məzənnəsi, yəni səhm/çek nisbəti aşağıdakı düsturla müəyyən edilir:

K=Sü/Çü

burada,

K - hərracın məzənnəsidir (səhm/çek);

Sü - hərraca çıxarılmış səhmlərin ümumi sayıdır;

Çü- hərraca təqdim edilmiş bütün sifarişlərdə səhmlərin dəyərini ödəmək üçün təklif edilən çeklərin ümumi sayıdır.

5.4. 1-ci növ sifariş vermiş qaliblərə satılan səhmlərin sayı aşağıdakı kimi müəyyənləşdirilir:

S11 x K

Burada S1 qaliblərə satılan səhmlərin sayı; K - hərracın məzənnəsi (səhm/çek); Ç1 - sifarişlərdə göstərilmiş özəlləşdirmə çeklərinin sayı.

5.5. 2-ci növ sifariş vermiş və satış qiymətindən aşağı qiymət göstərmiş qaliblərə satılan səhmlərin sayı hərracın məzənnəsinə uyğun olaraq müəyyən edilir.

5.6. 2-ci növ sifariş vermiş və satış qiymətinə bərabər qiymət göstərmiş iştirakçılara satılan səhmlərin ümumi sayı aşağıdakı düstur ilə müəyyənləşdirilir:

S2=Sü - S

Burada S2 - 2-ci növ sifariş vermiş iştirakçılara satılan səhmlərin ümumi sayı, Sü - hərracda satılan səhmlərin ümumi sayı; S - bu Əsasnamənin 5.4-cü və 5.5-ci bəndlərinə uyğun hərrac qaliblərinə satılan səhmlərin ümumi sayı.

5.7. 2-ci növ sifarişlərdə səhmlərin təklif olunan qiyməti satış qiymətinə bərabər olduqda bu sifarişlәr aşağıdakı qaydada ödənilir:

əvvəlcə daha çox sayda özəlləşdirmə çekləri göstərilən sifarişlər ödənilir, sonra göstərilən özəlləşdirmə çeklərinin sayına görə ikinci olan sifarişlər ödənilir. Bu Əsasnamənin 5.5-ci bəndində göstərildiyi kimi səhmlərin ümumi sayı S2 səviyyəsinə çatanadək iştirakçılar tərəfindən alınır.

6. İxtİsaslaşdırılmış pul hərraclarının keçİrİlməsİ qaydası

6.1. İxtisaslaşdırılmış pul hərracları aşağıdakı qaydada keçirilir:

sifarişlərdə göstərilən pul vəsaitinin ümumi məbləği satışa çıxarılan səhmlərin ümumi nominal dəyərinin 10 faizindən az və 20 faizindən çox olmadıqda hərraca çıxarılmış səhmlər tam (100 faiz miqdarında) satılır. Əgər sifarişlərdə göstərilən pul vəsaitinin ümumi məbləği satışa çıxarılan səhmlərin ümumi nominal dəyərinin 60 faizi məbləğində və ya bundan çoxdursa, o halda hərraca çıxarılmış səhmlərin yalnız 20 faizi satılır. Qalan səhmlər növbəti hərraca çıxarılır. Sifarişlərdə göstərilən pul vəsaitinin ümumi məbləği satışa çıxarılan səhmlərin ümumi nominal dəyərinin 20 faizindən çox, 60 faizindən az hissəsini təşkil etdikdə satılan səhmlərin miqdarı, verilən sifarişlərdəki pul vəsaitinin ümumi məbləği artdıqca, satılacaq səhmlərin sayının azalması prinsipinə əsasən müəyyən edilir və aşağıdakı qaydada hesablanır:


 

Sifarişlərdə göstərilən pul vəsaitinin ümumi məbləğinin satışa çıxarılan səhmlərin ümumi nominal dəyərinə nisbəti, faizlə

20 + N

 


Hәrraca çıxarılmış sәhmlәrin satılacaq hissəsi, faizlə

 

 

60-N


Burada N - sifarişlərin məcmu məbləğinin səhmlərin ümumi dəyərinə nisbəti hissəsinin faizlə ifadəsidir.

Satılmayan səhmlər yuxarıda müəyyən olunmuş qaydada növbəti hərraca çıxarılır.

sifarişlərdə təklif olunmuş pul vəsaitinin ümumi məbləği satışa çıxarılan səhmlərin ümumi nominal dəyərinin 10 faizindən az olduqda, ixtisaslaşdırılmış pul hərracı baş tutmamış hesab edilir. Ödənilmiş pul vəsaiti hərracın baş tutmaması haqqında qərar qəbul edildikdən sonra 10 (on) gün müddətində sifarişçilərə qaytarılır;

sifarişçilər hərracda iştirak etmək üçün təklif etdiyi pul vəsaitinin satıcı tərəfindən qabaqcadan elan edilmiş bank hesabına köçürmə yolu ilə və ya Respublika Auksion Mərkəzinə (onun zona bölmələrinə) satıcı tərəfindən müəyyən edilmiş qaydada nağd şəkildə ödәyә bilərlər;

sifarişlərin qəbulu üçün müəyyən edilmiş müddət başa çatdıqdan sonra ödənilmiş pul vəsaiti 3 (üç) gün müddətinə DƏN-nin hesabına daxil olmazsa, komissiya tərəfindən qəbul edilməmiş sayılır və hərracın məzənnəsi müəyyən edilərkən nəzərə alınmır;

hərrac komissiyası daxil olmuş sifarişlərin əsasında hərracın məzənnəsini, yəni səhm/pul nisbətini müəyyən edir;

bütün 1-ci növ sifarişlər ödənilir;

hərrac məzənnəsindən aşağı qiymət təklif etmiş iştirakçıların bütün 2-ci növ sifarişləri ödənilir;

hərrac məzənnəsinə bərabər qiymət göstərilmiş 2-ci növ sifarişlər 6.4.4-cü bənddə göstərilən qaydada ödənilir;

hərrac məzənnəsindən yüksək qiymət təklif etmiş 2-ci növ sifarişlər ödənilmir. Həmin sifarişçilər tərəfindən ödənilmiş pul vəsaiti hərracın nəticələri barədə qərar qəbul edildikdən sonra 10 (on) gün müddətində sifarişçilərə qaytarılır.

6.2. Sifarişləri ödənilmiş bütün iştirakçılar hərracın qalibi hesab edilirlər.

6.3. Hərracın məzənnəsi, yəni hər 10 000 (on min) manata düşən səhmlərin sayı aşağıdakı düsturla müəyyən edilir:

K= 10 000 x Sü/Mü

burada,

K - hərracın məzənnəsi;

Sü - hərraca çıxarılmış səhmlərin ümumi sayı;

Mü - hərraca təqdim edilmiş bütün sifarişlərdə səhmlərin dəyərini ödәmәk üçün təklif edilən pul vəsaitinin ümumi məbləğidir.

6.4. Qalib elan edilmiş hərrac iştirakçılarına satılan səhmlərin sayı aşağıdakı qaydada müəyyən edilir:

6.4.1. sifarişlәrdә almaq istədiyi səhmlərin sayını göstərməyən iştirakçılara (1-ci növ sifarişlər üzrə) satılan səhmlərin sayı aşağıdakı düsturla hesablanır:

S1 = K x M1

burada,

S1 - 1-ci növ sifariş vermiş sifarişçilərə satılan səhmlərin sayıdır;

M1 - 1-ci növ sifarişlərdən səhmlərin dəyərini ödəmək üçün təklif edilən pul vəsaitinin ümumi məbləğidir;

6.4.2. sifarişlәrdә hərracın məzənnəsindən aşağı qiymət təklif etmiş iştirakçılara (2-ci növ sifarişlər üzrə) satılan səhmlərin sayı 1-ci növ sifariş vermiş iştirakçılara satılan səhmlərin müəyyən edilməsi qaydası ilə hesablanır.

6.4.3. sifarişlərdə hərracın məzənnəsinə bərabər qiymət təklif etmiş iştirakçılara (2-ci növ sifarişlər üzrə) satılan səhmlərin sayı aşağıdakı düsturla hesablanır:

S2 = Sü - S

burada,

S - 6.4.1. və 6.4.2.-ci bəndlərdə nəzərdə tutulmuş qaydada hərrac iştirakçılarına satılan səhmlərin sayıdır.

6.4.4. Hərracın məzənnəsinə bərabər qiymət təklif edilmiş sifarişlər ən çox pul vəsaiti təklif etmiş alıcıdan başlayaraq ən az pul vəsaiti təklif etmiş alıcıya ödənilmək şərti ilə həyata keçirilir.

6.4.5. Zəruri hallarda hərrac komissiyasının qərarı ilə səhmdar cəmiyyətin nizamnamə kapitalı dəyişdirilmədən səhmlərin bölünməsi (bir səhmin ilkin nominal qiymətindən daha kiçik eyni nominallı səhmlərə bölünməsi) aparıla bilər.

7. Hərracların nətİcələrİnİn rəsmİləşdİrİlməsİ

7.1. Hər iki növ hərracın nəticələrinə görə yekun protokolu iki nüsxədə tərtib edilir, hərraca yekun vurulan gün hərrac komissiyasının iclasında iştirak edən komissiya üzvləri tərəfindən imzalanır və təsdiq olunmaq üçün satıcıya verilir. Həmin protokol 10 (on) gün müddətində DƏN tərəfindən təsdiq edilir. Hərracın yekunları haqqında protokolda aşağıdakılar göstərilir:

protokolun tarixi və nömrəsi;

satıcının adı;

hərracın yekunları üzrə iclasda iştirak edən komissiya üzvlərinin siyahısı;

səhmləri hərraca çıxarılan səhmdar cəmiyyətinin tam adı, hüquqi ünvanı;

hərracın yekun qiyməti və onun hərracın qalibi tərəfindən ödənilməsi üsulu (pul və ya özəlləşdirmə payı ilə);

qalib gəlmiş şəxslərin adı, hüquqi ünvanı.

7.2. Hərracın nəticələri hərrac başa çatdığı gündən 15 (on beş) gün müddətində DƏN-in rəsmi mətbu orqanı olan "Mülkiyyət" qəzetində dərc olunur. Hərracın nəticələri haqqında məlumatda aşağıdakılar göstərilməlidir":

səhmləri satışa çıxarılan səhmdar cəmiyyətinin tam rəsmi adı, hüquqi ünvanı;

satışa çıxarılan səhmlərin ümumi miqdarı və növləri;

səhmlərin nominal dəyəri;

sifarişçilərdən daxil olmuş sifarişlərin miqdarı və növü;

hərraclarda iştirak etməyə buraxılmış sifarişçilərin sayı;

sifarişçilər tərəfindən təqdim edilmiş özəlləşdirmə çeklərinin sayı və ya ödənilmiş pul vəsaitinin məbləği;

hərracın məzənnəsi;

satılmış səhmlərin sayı və ümumi dəyəri.

8. Hərracın nətİcələrİ üzrə mülkİyyət hüquqlarının rəsmİləşdİrİlməsİ

8.1. Alıcı hərraclarda aldığı səhmlərə mülkiyyət hüququnu hərracın nəticələri haqqında protokolun təsdiq edildiyi gündən əldə edir və bu barədə DƏN ona müvafiq sənəd verir.

8.2. Səhmdar cəmiyyətinin səhmlərinin satışına dair yekun məlumatlar təsdiq edildikdən sonra DƏN tərəfindən Milli Depozit Mərkəzinə təqdim edilir.

8.3. İxtisaslaşdırılmış çek hərraclarında təqdim edilmiş özəlləşdirmə payları hərracın nəticələri haqqında protokolun təsdiq edildiyi gündən sonra II Dövlət Proqramına müvafiq olaraq silinir.

9. Özəlləşdİrmənİn nətİcələrİnİn etİbarsız hesab edİlməsİ

9.1. Hərrac vasitəsi ilə özəlləşdirmənin nəticələri qanunvericiliklə müəyyən edilmiş hallarda və qaydada etibarsız hesab edilə bilər.

 

Azərbaycan Respublikası Prezidentinin
2000-ci il 23 dekabr tarixli 432 nömrəli Fərmanı ilə

TƏSDİQ edİlmİşdİr

 

Dövlət müəssisələrinin müflis elan olunma yolu ilə özəlləşdirilməsi
QAYDALARI

1. Ümumİ müddəalar

1.1. Bu Qaydalar "Müflisləşmə və iflas haqqında" və "Dövlət əmlakının özəlləşdirilməsi haqqında" Azərbaycan Respublikasının qanunlarına və "Azərbaycan Respublikasında dövlət əmlakının özәllәşdirilmәsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır və dövlət müəssisələrinin müflis elan olunması yolu ilə özəlləşdirilməsi qaydalarını müəyyən edir.

1.2. II Dövlət Proqramına əsasən, hərrac vasitəsi ilə satışı mümkün olmayan dövlət müəssisələri müflis elan olunaraq özəlləşdirilə bilər. Dövlət müəssisəsinin hərrac vasitəsi ilə satışı baş tutmadıqda, özəlləşdirmə prosesinə dövlət nəzarətini həyata keçirən Dövlət Komissiyası dövlət müəssisəsinin müflis elan olunması yolu ilə özəlləşdirilməsi barədə təşəbbüs irəli sürə bilər.

1.3. Dövlət müəssisəsinin 5 (beş) dəfə hərrac vasitəsi ilə satışı baş tutmadıqda və ya dövlət müəssisəsinin (obyektinin) özəlləşdirilməsinə hazırlıq mərhələsində onun maliyyə-təsərrüfat fəaliyyətinin göstəriciləri qeyri-qənaətbəxş (müflis) hesab edildiyi halda II Dövlət Proqramının 2.2-ci bəndi ilə özəlləşdirilməsi nəzərdə tutulan müəssisə və obyektlər Azərbaycan Respublikası Prezidentinin qərarı ilə, II Dövlət Proqramının 2.3-cü bəndi ilə özəlləşdirilməsi nəzərdə tutulan müəssisə və obyektlər isə Özəlləşdirmə Prosesinə Dövlət Nəzarətini Həyata Keçirən Dövlət Komissiyasının qərarı ilə qanunvericiliyə uyğun olaraq müflis elan edilə bilər və müəssisə ləğv oluna bilər. Bu zaman müəssisənin əmlakı hərrac vasitəsi ilə bu Qaydalarda müəyyən edilmiş qaydada satılır. .

1.4. Müflis elan olunmuş müəssisələrin əmlakının satışını Azərbaycan Respublikasının Dövlət Əmlakı Nazirliyi həyata keçirir.

2. Dövlət müəssİsəsİnİn müflİs elan olunması yolu İlə özəlləşdİrİlməsİ üçün əsas şərtlər

Özəlləşdirilməyə hazırlıq mərhələsində dövlət müəssisələrinin müflis elan olunması üçün aşağıdakılar əsas götürülə bilər:

"Müflisləşmə və iflas haqqında Azərbaycan Respublikası Qanunun 3-cü maddəsinə uyğun olaraq müəssisənin ödəmə qabiliyyətsizliyinin təsdiq olunması;

müəssisənin borclarının dondurulması, maliyyə-texniki yardımlarının göstərilməsi yolu ilə fəaliyyətinin yenidən bərpa edilməsi və dirçəldilməsi üzrə tərtib edilən layihələrin lazımi səviyyədə müsbət nəticə verməməsi;

müəssisənin sağlamlaşdırılması və dirçəldilməsi üzrə tədbirlərin müsbət nəticə verməyəcəyinin iqtisadi hesablamalar yolu ilə təsdiq olunması;

kreditorların ümumi tələbi üzrə borc məbləğin müəssisənin nizamnamə kapitalının (kreditlər və digər borclar, kreditorlarla hesablaşmalar və balansın passivinə aid olan digər müvəqqəti cəlb edilmiş vəsaitlər çıxılmadan) on faizindən çox hissəsini təşkil etdikdə və bu barədə onların müvafiq müraciəti olduqda;

müəssisənin qanunvericiliklə müəyyən edilmiş qaydada 5 (beş) dəfə hərraca çıxarılmasına baxmayaraq onun satılmaması və özəlləşdirilməsi üçün heç bir sifarişin verilməməsi;

müəssisənin hərracda satılmamasına baxmayaraq onun tərkibində olan obyektlərdən ikisinin və ya daha çoxunun ayrıca özəlləşdirilməsi barədə müraciətlərin daxil olması;

borcların ödənilməsinin, balansda və istifadədə olan əsas vəsaitlərin, torpaq sahələrinin, digər əmlakın səmərəli istifadəsinin yalnız müəssisənin restrukturizasiyası, onun tərkibindən bölmələrin, obyektlərin, əsas vəsaitlərin çıxarılması və ayrıca satılması yolu ilə mümkün olması.

3. Dövlət MÜӘSSİSӘSİNİN müflİs elan olunması yolu İlə özəlləşdİrİlməsİ

3.1. Dövlət müəssisəsinin müflis elan olunması və ləğv edilməsi prosesi qüvvədə olan qanunvericiliyə uyğun olaraq həyata keçirilir.

Bu zaman müəssisənin əmlakı hərrac vasitəsi ilə satılır. Əldə edilən maliyyə vəsaitinin bir hissəsi qanunvericiliklə müəyyən edilmiş növbəlilik prinsipi nəzərə alınmaqla kreditorların borclarının ödənilməsinə yönəldilir.

3.2. II Dövlət Proqramının 4.2-ci bəndində uyğun olaraq müflis elan olunması yolu ilə özəlləşdirilən müəssisənin əmlakının dəyərinin 15 faizi müəssisənin əmək kollektivi üzvlərinə və onlara bərabər tutulan şəxslərə güzəştli satışa yönəldilir.

3.3. Aşağıdakılar hərrac vasitəsi ilə özəlləşdirilən əmlakın tərkibindən çıxarılır:

qanunvericilikdə özəlləşdirilməsi qadağan olunan əmlak;

üzərinə həbs qoyulmuş əmlak;

qanunvericiliklə dövlət və ya yerli özünüidarəetmə orqanlarının sərəncamına verilməli olan əmlak.

3.4. Hərraca çıxarılan əmlakın qiymətləndirilməsi qüvvədə olan qanunvericiliyə müvafiq olaraq həyata keçirilir.

4. Mülkİyyət hüququnun rəsmİləşdİrİlməsİ və özəlləşdİrmə əqdlərİnİn etİbarsız hesab edİlməsİ

4.1. Müflis elan olunmuş dövlət müəssisələrinin əmlakına mülkiyyət hüququ qanunvericiliklə müəyyən olunmuş qaydada alqı-satqı müqaviləsi bağlandıqdan sonra alıcıya keçir.

4.2. Müflis elan olunmuş müəssisələrin özəlləşdirilmə əqdləri qanunvericiliklə müəyyən olunmuş hallarda və qaydada etibarsız hesab edilə bilər.

 

Azərbaycan Respublikası Prezidentinin
2000-ci il 23 dekabr tarixli 432 nömrəli Fərmanı ilə

TƏSDİQ edİlmİşdİr

 

Özəlləşdirmədən əldə olunan vəsaitin Azərbaycan Respublikasının dövlət büdcəsinə daxil edilməsi və ondan istifadə olunması
QAYDALARI

1. Bu Qaydalar "Dövlət əmlakının özəlləşdirilməsi haqqında" Azərbaycan Respublikasının Qanununa və "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır və özəlləşdirmədən əldə olunan vəsaitin Azərbaycan Respublikasının dövlət büdcəsinə daxil edilməsi və ondan istifadə olunması qaydalarını müəyyən edir.

2. Özәllәşdirmәdәn daxil olan vəsaitə özəlləşdirilən obyektlərin və onların səhmlərinin, özəlləşdirmə opsionlarının satışından, özəlləşdirmə prosesində rüsumların ödənilməsindən əldə edilən pul vəsaiti və digər daxilolmalar aiddir.

Özәllәşdirmәdәn əldə olunan pul vəsaiti Azərbaycan Respublikasının dövlət büdcəsinə daxil edilir.

3. Özəlləşdirilən dövlət müəssisə və obyektlərinin, onlara məxsus səhmlərin satışı zamanı alıcılarının ödəyəcəkləri pul vəsaitinin həcmi və onun ödəmə müddəti qanunvericilik aktlarına müvafiq olaraq alıcı ilə Azərbaycan Respublikasının Dövlət Əmlakı Nazirliyi arasında bağlanan müqavilə əsasında, müsabiqə və hərrac şərtlərinə uyğun olaraq müəyyən edilir.

4. Ödəmə məbləği alıcı tərəfindən özəlləşdirilən obyektin satış şərtlərinə uyğun olaraq dövlət büdcəsinə köçürülür.

5. Ödəniş sənədlərində alıcılar bank rekvizitlərini, ödənişin təyinatını, vəsaitin köçürülməsinin əsasını, özəlləşdirilən obyektin adını və sair göstərməlidirlər.

6. "Dövlət əmlakının özəlləşdirilməsi haqqında" Azərbaycan Respublikası Qanununun 11.3-cü maddəsinə əsasən özəlləşdirmədən daxil olan vəsaitdən vergi tutulmur.

7. Özəlləşdirmədən daxil olmuş vәsaitdәn qanunvericiliklə müəyyən edilmiş qaydada istifadə olunur.

8. Dövlət əmlakının özəlləşdirilməsi nəticəsində əldə edilən pul vəsaitinin statistik və mühasibat hesabatının aparılması və həmin vəsaitin dövlət büdcəsinə köçürülmәsinin təmin olunması Azərbaycan Respublikasının Dövlət Əmlakı Nazirliyi tərəfindən həyata keçirilir.

9. Dövlət əmlakının özəlləşdirilməsi prosesində müstəqil maliyyə məsləhətçisinin cəlb edilməsi, özəlləşdirmə ilə bağlı informasiya təminatının təşkili və müəssisələrin özəlləşdirməqabağı sağlamlaşdırılması üçün Azərbaycan Respublikası Dövlət Əmlakı Nazirliyinin hesabına bu vəsaitin 25 faizi həcmində ayırmalar nәzәrdә tutulur.

10. Müəssisələrin özəlləşdirməqabağı sağlamlaşdırılması ilə bağlı vəsaitin istifadəsi barədə qərarlar II Dövlət Proqramının 2.2-ci bəndində göstərilən müəssisələr üçün Azərbaycan Respublikasının Prezidenti tərəfindən, II Dövlət Proqramının 2.3-cü bəndində göstərilən müəssisələr üçün isə Özəlləşdirmə Prosesinə Dövlət Nəzarətini Həyata Keçirən Dövlət Komissiyası tərəfindən qəbul edilir.

 

Azərbaycan Respublikası Prezidentinin
2000-ci il 23 dekabr tarixli, 432 nömrəli Fərmanı ilə

TӘSDİQ edİlmİşdİr

 

Özəlləşdirilən dövlət əmlakına (müəssisə və obyektlərinə) mülkiyyət hüququnun rəsmiləşdirilməsi
QAYDALARI

1. Bu Qaydalar "Dövlət əmlakının özəlləşdirilməsi haqqında" Azərbaycan Respublikasının Qanununa və "Azərbaycan Respublikasında dövlət əmlakının özəlləşdirilməsinin II Dövlət Proqramı"na (bundan sonra - II Dövlət Proqramı) uyğun olaraq hazırlanmışdır və özəlləşdirilən dövlət əmlakına mülkiyyət hüququnun rəsmiləşdirilməsi qaydalarını müəyyən edir.

2. Dövlət əmlakının satılması haqqında qərar qəbul olunduqdan, hərracların müsabiqələrin nəticələri barədə isə protokol imzalandıqdan sonra alıcı ilə Azərbaycan Respublikasının Dövlət Əmlakı Nazirliyi (bundan sonra - DƏN) arasında Azərbaycan Respublikasının qanunvericiliyinə uyğun olaraq alqı-satqı müqaviləsi bağlanır.

3. Özəlləşdirmə nəticəsində bağlanan alqı-satqı müqaviləsində satılmış obyektin adı, tərkibi və satış qiyməti, onun ödənilməsinin forma və müddətləri, satıcı, alıcı və vasitəçilər haqqında məlumat, onların ünvanı, obyektin sonrakı istifadəsi barədə qarşılıqlı öhdəliklər, həmin obyektin satılması şərtləri və bu şərtlərin pozulmasına görə tərəflərin məsuliyyəti, obyektin yerləşdiyi torpaq sahəsindən istifadə qaydaları və müqaviləyə xitam verilməsi qaydaları göstərilməlidir. Tərəflərin razılığı ilə müqavilədə digər şərtlər də göstərilə bilər.

4. Müqavilə, qanunvericilikdə və müqavilədə başqa hal nәzәrdә tutulmamışdırsa, DƏN-də qeydiyyatdan keçdiyi andan özəlləşdirilmiş obyektə mülkiyyət hüququ DƏN-dən alıcıya keçir və DƏN tərəfindən alıcıya bu barədə mülkiyyət hüququnu təsdiq edən şəhadətnamə verilir.

Mülkiyyət hüququnu təsdiq edən şəhadətnamələr xüsusi keyfiyyətli kağızlardan hazırlanır, onların ciddi uçotu aparılır və verilməsi xüsusi kitablarda qeyd edilir (özəlləşdirilən dövlət əmlakına mülkiyyət hüququnu təsdiq edən şәhadәtnamәnin forması bu Qaydalara əlavə edilir).

5. Əmlak əmək kollektivi tərəfindən möhlətlə alındıqda, mülkiyyət hüququ ona ilkin ödəmə haqqını vermәklә, sonrakı ödəmələr üçün əmlakın haqqı ödənilmiş hissəsini girov qoyaraq təminat verdikdən sonra keçir.

Özəlləşdirilmiş əmlak özəlləşdirmə əqdi qüvvədə olduğu müddətdə özgəninkiləşdirildikdə, bu əqdlə müəyyən edilmiş öhdəliklər həmin əmlakı əldə etmiş yeni mülkiyyətçi üçün məcburidir.

6. Əmlakı möhlətlə almış əmək kollektivi sonrakı ödəmələri vaxtında həyata keçirmədikdə, DƏN Azərbaycan Respublikasının Mülki Məcəlləsinə, "Girov haqqında" Azərbaycan Respublikası Qanununa uyğun olaraq girov qoyulmuş əmlakın mülkiyyətçisi hüququnu әldә edir və girov qoyulmuş əmlakı II Dövlət Proqramında nəzərdə tutulmuş qaydada pul hərracları vasitəsi ilə sataraq, alıcının borcunu əldə edilmiş vəsait hesabına ödəyir. Bu zaman əmək kollektivi (əmək kollektivinin üzvləri) hərracda iştirak etdikdə güzəşt hüququnu itirir.

7. Alıcı ixtisaslaşdırılmış çek və pul hərraclarında aldıqları səhmlərə mülkiyyət hüququnu hərracların nəticələri haqqında protokolun təsdiq edildiyi gündәn əldə edir. Bu halda DƏN tərəfindən ona mülkiyyәt hüququnu təsdiq edən müvafiq bildiriş verilir.

 

Azərbaycan Respublikası Prezidentinin
2000-ci il 23 dekabr tarixli 432 nömrəli
Fərmanı ilə təsdiq edilmiş "Özəlləşdirilən
dövlət əmlakına (müəssisə və obyektlərinə)
mülkiyyət hüququnun rəsmiləşdirilməsi
Qaydaları"na
Əlavə

Azərbaycan Respublikasının Dövlət Əmlakı Nazirliyi Dövlət əmlakının hüquqi və fiziki şəxslərə satılması haqqında
ŞƏHADƏTNAMƏ

Əmlak üzərində mülkiyyət hüququnu təsdiq edən bu şəhadətnamə vərilir____________________________________________________________________
(hüquqi şəxsin adı,
________________________________________________________________________
müəssisənin rəhbərinin, fiziki şəxsin S.A.A.)
ona görə ki, o (onlar) həqiqətən _______________________________________________
________________________________________________________________________
(alınmış əmlakın ünvanı və adı)
qüvvədə olan qanunvericilik əsasında satın almışdır.
Alınmış əmlakın tərkibi: _____________________________________________________
________________________________________________________________________
Əmlakın ümumi satış qiyməti:
manat ___________________________________________________________________
(sözlə)
Dövlət əmlakının alınması nəticəsində hesablaşma hesabı__________________________
ünvanlı dövlət büdcəsinə ____________________________________________________
(sözlə)

manat məbləğində pul köçürülmüşdür.
Bu şəhadətnamə ilə rəsmiləşdirilən həmin
________________________________________________________________________
(obyektin adı) (hüquqi şəxsin adı və ya fiziki şəxsin S.A.A.)
daimi toxunulmaz mülkiyyətidir.
Reyestr kitabı _______________________
səhifə________________________________
qeydiyyat ___________________________
tarix__________________________________
Nazir:
M.Y.

Qeydiyyat icraçısı:
___________________ ___________________________